Ishki ister ministrligi uiymdasqan qylmystyq toptardyń qyzmetin anyqtaý jáne jolyn kesý boiynsha jumysty júieli túrde júrgizip keledi, dep habarlaidy Dalanews.kz.
Olardyń kriminaldyq qyzmeti týraly dáleldemelerdi jinaý arqyly qylmystyq toptardyń jetekshileri men belsendi múshelerin qoǵamnan oqshaýlaý jóninde keshendi sharalar qabyldanyp jatyr.
Jyl basynan beri uiymdasqan qylmystyq top qurý, oǵan basshylyq etý jáne qatysý boiynsha 15 fakti anyqtalyp, tirkeldi. Ártúrli qylmystar jasaǵany úshin qylmystyq toptardyń 30-dan astam jetekshileri men belsendi músheleri ustaldy.
Máselen, 7 aqpanda IIM men UQK qyzmetkerleri Almaty qalasynda quramynda belgili "Aishýaq-Jantúgel" uiymdasqan qylmystyq tobynyń músheleri bar topty quryqtady.
7 atys jáne travmatikalyq qarý, 4 granata, 200-den astam oq-dári, esirtki zaty, sondai-aq basqa da sýyq qarý tárkilendi. Top músheleri kásipkerlerge ózderiniń kriminaldyq “qamqorlyǵyn” kórsete otyryp, olardy bopsalaýmen ainalysqany anyqtaldy. Olar Almaty qalasynyń temir jol vokzaldary aýmaǵynda, sondai-aq bazarlarynda óz yqpalyn júrgizgen.
