«Balaqaı jylap turdy. Adasyp qalypty. Sheshesi jaqyn mańdaǵy dúkenniń birine kirip ketipti. Biraq naqty qaı dúkenge kirgenin kórsete almady. Áriptesim ekeýmiz aınaladaǵy dúkenderdiń birazyn aralap shyqtyq. Balanyń anasyn tappadyq. Búldirshinniń aty – Arýjan eken. Sheshesiniń atyn Bota dep aıtty. Bala shamamen 4 jasta, – deıdi máseleniń mán-jaıyn túsindirgen Ákimshilik polısıa basqarmasy arnaıy batalónynyń aǵa ınspektory Juma Sultan.
Tártip saqshylary balany Almaly aýdandyq ishki ister bólimine jetkizgen. Ázir búldirshinniń anasy izdestirilip jatyr.
"Sonymen qatar balanyń óz aýzynan aıtylǵan aqparattyń anyq-qanyǵyn tekserip jatyrmyz. Biletinimiz balanyń jáne anasynyń aty ǵana. Alaıda jańa málimetter shyǵyp jatsa, jedel habarlap otyramyz", – deıdi Almaty qalasy İİD Jergilikti polısıasy qyzmetiniń ıývenaldy polısıa bóliminiń basshysy Leıla Álipbaeva.
Bálkim, balaqaı shynymen adasyp qalǵan shyǵar. Endeshe bul anasynyń beıqamdyǵynan bolýy múmkin. Súp-súıkimdi qoshaqandy tastap ketti degen júregimiz senbeı tur...
