«بالاقاي جىلاپ تۇردى. اداسىپ قالىپتى. شەشەسى جاقىن ماڭداعى دۇكەننىڭ بىرىنە كىرىپ كەتىپتى. ءبىراق ناقتى قاي دۇكەنگە كىرگەنىن كورسەتە المادى. ارىپتەسىم ەكەۋمىز اينالاداعى دۇكەندەردىڭ ءبىرازىن ارالاپ شىقتىق. بالانىڭ اناسىن تاپپادىق. ءبۇلدىرشىننىڭ اتى – ارۋجان ەكەن. شەشەسىنىڭ اتىن بوتا دەپ ايتتى. بالا شامامەن 4 جاستا، – دەيدى ماسەلەنىڭ ءمان-جايىن تۇسىندىرگەن اكىمشىلىك پوليسيا باسقارماسى ارنايى باتالونىنىڭ اعا ينسپەكتورى جۇما سۇلتان.
ءتارتىپ ساقشىلارى بالانى المالى اۋداندىق ىشكى ىستەر بولىمىنە جەتكىزگەن. ءازىر ءبۇلدىرشىننىڭ اناسى ىزدەستىرىلىپ جاتىر.
"سونىمەن قاتار بالانىڭ ءوز اۋزىنان ايتىلعان اقپاراتتىڭ انىق-قانىعىن تەكسەرىپ جاتىرمىز. بىلەتىنىمىز بالانىڭ جانە اناسىنىڭ اتى عانا. الايدا جاڭا مالىمەتتەر شىعىپ جاتسا، جەدەل حابارلاپ وتىرامىز"، – دەيدى الماتى قالاسى ءىىد جەرگىلىكتى پوليسياسى قىزمەتىنىڭ يۋۆەنالدى پوليسيا ءبولىمىنىڭ باسشىسى لەيلا الىپبايەۆا.
بالكىم، بالاقاي شىنىمەن اداسىپ قالعان شىعار. ەندەشە بۇل اناسىنىڭ بەيقامدىعىنان بولۋى مۇمكىن. سۇپ-سۇيكىمدى قوشاقاندى تاستاپ كەتتى دەگەن جۇرەگىمىز سەنبەي تۇر...
