Almatyda aktsizdeletin taýarlardyń zańsyz ainalymyna qarsy júrgizilgen tekserister nátijesinde iri kólemdegi alkogol, temeki jáne munai ónimderi tárkilendi, dep habarlaidy Dalanews.kz.
Qalalyq memlekettik kirister departamentiniń málimetinshe, on aidyń ishinde zańsyz ainalymnan:
— 180,2 myń litrden astam alkogol ónimderi;
— 1 millionnan astam temeki qoraby;
— 10 myń tonnadan asa munai ónimderi tárkilengen.
Departament quqyq buzýshylyqtyń basym bóligi litsenziiasyz saýda jasaý, taýarǵa ilespe qujattardyń bolmaýy jáne temeki ónimderiniń tańbalanbaýy siiaqty zań talaptaryn óreskel buzýmen bailanysty ekenin atap ótti.
— Aktsizdeletin ónimderdiń zańsyz ainalymy memleketke de, adal kásipkerlerge de aitarlyqtai ziian keltiredi, sondai-aq halyqtyń densaýlyǵyna qaýip tóndirýi múmkin. Aktsizdik taýarlardyń túpnusqalyǵyn tekserý úshin turǵyndar «e-Sapa» jáne «NAQTY ONIM» mobildi qosymshalaryn paidalana alady, — dep habarlady departament.
