Eýraziialyq taý týrizmin damytý forýmynda «Almaty Tau Management» kompaniiasy basqarma tóraǵasy Jan-Per Baralo saraptamalyq baiandama jasady, dep habarlaidy Dala news.
Spiker óz sózinde taý kýrorttaryn damytýdaǵy halyqaralyq tájiribege jáne klasterlik modelderdiń tiimdiligine taldaý jasap, Almaty taý klasterin qalyptastyrý perspektivalaryna erekshe toqtaldy.
Jan-Per Baralo Eýropa elderiniń, atap aitqanda Frantsiia men Aýstriianyń tájiribesin mysalǵa keltirdi. Onyń aitýynsha, bul memleketterde kýrorttardy biryńǵai infraqurylymdyq júiege biriktirý týrizm salasynyń turaqty ósimin qamtamasyz etip, óńirlerdiń básekege qabilettiligin arttyrǵan. Mundai modelder tek týrizm úshin ǵana emes, jalpy ekonomikalyq damý turǵysynan da tiimdi ekenin kórsetti.
«Halyqaralyq tájiribe klasterlik tásil aýmaqtardy keshendi damytýǵa, infraqurylym sapasyn arttyrýǵa jáne turaqty týristik ekojúie qalyptastyrýǵa múmkindik beretinin dáleldep otyr. Bul tek týrizm máselesi emes, uzaq merzimdi áleýmettik-ekonomikalyq ósim faktory», – dedi Jan-Per Baralo.
Baiandama barysynda taý klasterleriniń qalalyq ortaǵa yqpaly da qozǵaldy. Sarapshynyń aitýynsha, mundai jobalardy iske asyrý jańa biznes múmkindikteriniń paida bolýyna, jumyspen qamtýdyń keńeiýine jáne óńirlerdiń investitsiialyq tartymdylyǵynyń artýyna yqpal etedi.
«Taý klasterin damytý ómir sapasynyń ózgerýimen tikelei bailanysty. Zamanaýi kýrorttyq aýmaqtar ekonomikalyq belsendilik núktesine ainalyp, qyzmet kórsetýge suranys qalyptastyrady, jańa jumys oryndaryn ashady jáne týrister men jergilikti turǵyndarǵa qajetti infraqurylymnyń damýyn yntalandyrady», – dep atap ótti sarapshy.
Jan-Per Baralonyń pikirinshe, turaqty nátijege qol jetkizýdiń basty sharty – taý aýmaqtaryn damytýda strategiialyq ári uzaq merzimdi kózqaras qalyptastyrý jáne úzdik halyqaralyq tájiribeni óńirlik erekshelikterge beiimdei otyryp júieli engizý.
