Almaty taýlarynda joǵalǵan adamdardy izdeý-qutqarý jumystary jalǵasyp jatyr. Bul týraly Tótenshe jaǵdailar ministrligi málimdedi, dep habarlaidy Dalanews.kz.
TJD baspasóz qyzmetiniń málimetinshe, 26 jeltoqsan túnde 112 pýltine habarlama túsken. Habarlama avtory – 24 jeltoqsan kúni tańerteń baýyry men eki dosy taýǵa shyǵyp, oralmaǵanyn habarlaǵan. Joǵalǵandardyń uialy telefondary 12 saǵattan astam ýaqyt bailanystan ajyraǵan.
Habarlama túsken soń TJM kúshteri shuǵyl túrde jumyldyryldy: áýe borty, ROSO bólimsheleri, Kópqabatty apattar meditsina ortalyǵy, TJM Qutqarý qyzmetiniń qutqarýshylary, politsiia qyzmetkerleri men eriktiler. Izdeý jumystary úshin operativtik shtab qurylyp, Kazaviaspas tikushaǵy kóterildi. Qutqarýshylar "Týiýksý" muzdyǵy, "Myńjylqy" úńgiri jáne "Lokomotiv" shyńy aýdandaryn tekserip jatyr.
Izdeý barysynda "Lokomotiv" shyńy aimaǵynda dron arqyly tekserý júrgizilip, bir adamnyń máiiti tabyldy. TJM áýe borty ony teńiz deńgeiinen 3700 metr biiktikten tómen túsirip, keiin politsiia qyzmetkerlerine tapsyrdy.
"Sot-meditsinalyq saraptama taǵaiyndaldy. Adamnyń jeke basyn anyqtaý barlyq qajetti saraptamalar aiaqtalǵannan keiin júrgiziledi. Týystaryna TJD, ROSO jáne TJM psihologtary men meditsinalyq qyzmetkerleri psihologiialyq qoldaý kórsetýde», – dep habarlady TJD.
Qalǵan eki adamnyń qaida ekendigin anyqtaý boiynsha izdeý-qutqarý jumystary jalǵasyp jatyr.
