Ile Alataýy jotasynyń ortalyq bóliginde qar kóshkini júrý qaýpi bar, dep habarlaidy Dalanews.kz.
“Qar jinalý deńgeiin, morenalyq-muzdyq keshenderdiń jai-kúiin baǵalaý jáne Ile Alataýy jotasynyń ortalyq bóligindegi qar kóshkini qaýpi bar aýmaqtardy tekserý maqsatynda aerovizýaldy ushý júrgizildi. Tekserý nátijeleri boiynsha taýly aimaqta qardyń jinalý protsesi áli de jalǵasyp jatqany anyqtaldy. Boranmen qardyń jyljýyna bailanysty keibir kóshkin qaýpi bar ýchaskelerde qar kóshkini júrýi múmkin”, – delingen Tótenshe jaǵdailar ministrliginiń habarlamasynda.
Halyqtyń, týristerdiń qaýipsizdigin jáne “Úlken Almaty kóli – Kosmostantsiia” avtojolynyń úzdiksiz jumysyn qamtamasyz etý maqsatynda 2025 jylǵy 26 jeltoqsanda Úlken Almaty ózeni basseininde ornalasqan №18 kóshkin alqabynda qar kóshkinin profilaktikalyq túsirý josparlanǵan.
“Tótenshe jaǵdai ministrligi “Qazseldenqorǵaý” memlekettik mekemesiniń mamandary kóshkin qaýpi bar ýchaskelerde turaqty túrde monitoring júrgizedi. Búgingi kúnge deiin 13 jerústi tekserisi jasaldy. Qaýipti aimaqtarǵa 30 eskertý belgisi ornatyldy. 58 eskertý-hattama jáne “Abailańyz, kóshkin!”, “Abailańyz, shógindi muzdyq” taqyrybynda 556 úgit paraǵy taratyldy”, – dep atap ótti ministrlik.
Vedomstvonyń málimetinshe, qar kóshkininiń jaǵdaiy ýshyǵyp, “Qazgidromet” RMK-nyń daýyldy eskertýleri jariialanǵan jaǵdaida, TJ departamentteri men politsiia birlesip, halyq pen avtokóliktiń kóshkin qaýpi bar aimaqtarǵa kirýin shekteý úshin blok-beketter qoiady.
“Eger qar kóshkininiń júrýi týraly eskertý jariialansa, taýǵa barýdan bas tartqan jón. Eskertý bolmaǵan kúnniń ózinde jolǵa shyǵar aldynda aýa raiy boljamdaryn bilý, qozǵalys baǵytyn aldyn ala josparlaý, daiyndalmaǵan ýchaskelerde serýendeýden jáne shańǵy tebýden bas tartý, tek belgilengen marshrýttarmen júrý kerek. Sonymen qatar kóshkin qaýpi bar jerler týraly barynsha kóp aqparat jinap, qaýipti betkeilerden barynsha aýlaq bolý qajet. Eger taýǵa shyǵar aldynda qalyń qar jaýyp, qar molynan túsken bolsa, joryqty eki-úsh kúnge keiinge qaldyrǵan durys, al kóshkin bolmaǵan jaǵdaida qardyń turaqtanýyn kútken jón”, – dep usynady TJM.
