Almaty qalasynyń mamandandyrylǵan aýdanaralyq ekonomıkalyq soty "Kundelik" JSHS-niń Almaty qalasy Bilim basqarmasyna qatysty talap-aryzyn qarady. Soǵan sáıkes, qala mektepteri sot talqylaýy aıaqtalǵanǵa deıin Kundelik elektrondy jýrnaly men kúndeligine qaıta kóshýi tıis, dep habarlaıdy Dalanews.kz.
Daýdyń máni nede?
NeHabar telegram arnasynyń málimetinshe, "Kúndelik (Kundelik)" kompanıasy sotqa júginip, Almaty qalasynyń Bilim basqarmasyna jáne oǵan qarasty barlyq bilim berý uıymdary Kundelik-ten bas tartyp, balama platformalarǵa, sonyń ishinde BilimClass júıesine kóship jatqanyn aıtyp, bul áreketterdi jasaýǵa tyıym salýdy suraǵan.
Sot qandaı sheshim shyǵardy?
Sot qaýlysynda eki negizgi tarmaq kórsetilgen. Soǵan sáıkes, Almaty qalasy Bilim basqarmasyna, aýdandyq bilim bólimderine, mektepter men ózge de bilim berý uıymdaryna BilimClass platformasyna kóshýge, ony engizýge, aýystyrýǵa, synaqtan ótkizýge nemese pılottyq rejımde qoldanýǵa tyıym salyndy. Ekinshiden, Kundelik avtomattandyrylǵan aqparattyq júıesiniń ornyna kez kelgen basqa aqparattyq júıelerdi engizýge shekteý qoıyldy.
Bul neni bildiredi?
Osylaısha, BilimClass júıesine kóship úlgergen almatylyq mektepter men ata-analarǵa sot talqylaýy aıaqtalǵanǵa deıin qaıtadan Kundelik platformasyna kóshýge týra keledi.
Bilim berý prosesine áseri qandaı?
Mamandardyń pikirinshe, bul sheshim oqý prosesine eleýli qıyndyq týǵyzbaıdy. Kundelik platformasy mektepterde uzaq ýaqyttan beri qoldanylyp keledi jáne oqý prosesiniń ashyqtyǵyn qamtamasyz etedi. Ata-analar bir júıe arqyly sabaq kestesin, úı tapsyrmalaryn, baǵalardy jáne balanyń úlgerim kórsetkishterin kóre alady.
Muǵalimder qaǵazbastylyqtan arylyp, oqýshylarmen jedel baılanys ornatýǵa múmkindik alady. Al mektepter oqý nátıjeleri boıynsha keńeıtilgen analıtıkalyq derekterge qol jetkizedi.
Sonymen qatar platforma oqýshylardy yntalandyrýǵa arnalǵan quraldardy, sonyń ishinde ekinshi deńgeıli banktermen seriktestik aıasyndaǵy qarjylaı yntalandyrý tetikterin de usynady.
