الماتى قالاسىنىڭ مامانداندىرىلعان اۋدانارالىق ەكونوميكالىق سوتى "Kundelik" ءجشس-نىڭ الماتى قالاسى ءبىلىم باسقارماسىنا قاتىستى تالاپ-ارىزىن قارادى. سوعان سايكەس، قالا مەكتەپتەرى سوت تالقىلاۋى اياقتالعانعا دەيىن Kundelik ەلەكتروندى جۋرنالى مەن كۇندەلىگىنە قايتا كوشۋى ءتيىس، دەپ حابارلايدى Dalanews.kz.
داۋدىڭ ءمانى نەدە؟
نەحابار تەلەگرام ارناسىنىڭ مالىمەتىنشە، "كۇندەلىك (Kundelik)" كومپانياسى سوتقا جۇگىنىپ، الماتى قالاسىنىڭ ءبىلىم باسقارماسىنا جانە وعان قاراستى بارلىق ءبىلىم بەرۋ ۇيىمدارى Kundelik-تەن باس تارتىپ، بالاما پلاتفورمالارعا، سونىڭ ىشىندە BilimClass جۇيەسىنە كوشىپ جاتقانىن ايتىپ، بۇل ارەكەتتەردى جاساۋعا تىيىم سالۋدى سۇراعان.
سوت قانداي شەشىم شىعاردى؟
سوت قاۋلىسىندا ەكى نەگىزگى تارماق كورسەتىلگەن. سوعان سايكەس، الماتى قالاسى ءبىلىم باسقارماسىنا، اۋداندىق ءبىلىم بولىمدەرىنە، مەكتەپتەر مەن وزگە دە ءبىلىم بەرۋ ۇيىمدارىنا BilimClass پلاتفورماسىنا كوشۋگە، ونى ەنگىزۋگە، اۋىستىرۋعا، سىناقتان وتكىزۋگە نەمەسە پيلوتتىق رەجيمدە قولدانۋعا تىيىم سالىندى. ەكىنشىدەن، Kundelik اۆتوماتتاندىرىلعان اقپاراتتىق جۇيەسىنىڭ ورنىنا كەز كەلگەن باسقا اقپاراتتىق جۇيەلەردى ەنگىزۋگە شەكتەۋ قويىلدى.
بۇل نەنى بىلدىرەدى؟
وسىلايشا، BilimClass جۇيەسىنە كوشىپ ۇلگەرگەن الماتىلىق مەكتەپتەر مەن اتا-انالارعا سوت تالقىلاۋى اياقتالعانعا دەيىن قايتادان Kundelik پلاتفورماسىنا كوشۋگە تۋرا كەلەدى.
ءبىلىم بەرۋ پروسەسىنە اسەرى قانداي؟
مامانداردىڭ پىكىرىنشە، بۇل شەشىم وقۋ پروسەسىنە ەلەۋلى قيىندىق تۋعىزبايدى. Kundelik پلاتفورماسى مەكتەپتەردە ۇزاق ۋاقىتتان بەرى قولدانىلىپ كەلەدى جانە وقۋ پروسەسىنىڭ اشىقتىعىن قامتاماسىز ەتەدى. اتا-انالار ءبىر جۇيە ارقىلى ساباق كەستەسىن، ءۇي تاپسىرمالارىن، باعالاردى جانە بالانىڭ ۇلگەرىم كورسەتكىشتەرىن كورە الادى.
مۇعالىمدەر قاعازباستىلىقتان ارىلىپ، وقۋشىلارمەن جەدەل بايلانىس ورناتۋعا مۇمكىندىك الادى. ال مەكتەپتەر وقۋ ناتيجەلەرى بويىنشا كەڭەيتىلگەن اناليتيكالىق دەرەكتەرگە قول جەتكىزەدى.
سونىمەن قاتار پلاتفورما وقۋشىلاردى ىنتالاندىرۋعا ارنالعان قۇرالداردى، سونىڭ ىشىندە ەكىنشى دەڭگەيلى بانكتەرمەن سەرىكتەستىك اياسىنداعى قارجىلاي ىنتالاندىرۋ تەتىكتەرىن دە ۇسىنادى.
