Jiynda sóz alǵan oblys ákimi Amandyq Ǵabbasuly teatr, óner ujymdary, mýzei, arhiv pen kitaphana salasynyń qyzmetkerlerin kásibi merekemen quttyqtap, óńirdiń mádenietiniń órkendeýine úles qosqan 50-den asa qyzmetkerdi marapattady.
– «Óner – ulttyń jany» deidi halyq danalyǵy. Kez kelgen el ónerimen, mádenietimen tanylyp, baǵalanatyny anyq. Sizder arqyly halqymyzdyń mádenieti men óneri álemge tanylady. Máńgilik elimizge jarqyn bolashaq, jetisýlyq ónerpazdarǵa shyǵarmashylyq jolda tolaǵai tabys, eńbekterińizge jemis tileimin, – dep ónerdiń órken jaiyp, qoǵamnyń ajyramas bóligine ainalýy úshin barynsha jaǵdai jasalyp otyrǵandyǵyn atap ótti.
Jalpy, Almaty oblysynda 556 mádeniet, muraǵat mekemesi, 88 «Halyqtyq», «Úlgili» ataǵy bar ujym, 1406 kórkemónerpazdar úiirmesi bar. Sondai-aq 3214 qyzmetker ult rýhaniiaty men mádenieti jolynda eńbek etýde.
«Úzdik mádeniet qyzmetkeri» nominatsiiasy boiynsha oblystyń aýdan, qalalarynan 20 qyzmetker marapattaldy. Olardyń arasynda ártister, aýyldyq klýbtardyń, mádeniet úileriniń, kitaphanalardyń, shyǵarmashylyq ortalyqtardyń, aýdandyq mádeniet jáne tilderdi damytý bólimderiniń qyzmetkerleri bar. Árbir jeńimpazǵa diplom men 100 myń teńgeniń sertifikaty berildi.
Sondai-aq 9 nominatsiia – «Halyqtyq, úlgili ataǵy bar úzdik ujym», «Úzdik teatr ártisi», «Úzdik mádeniet úii», «Úzdik kitaphana», «Úzdik mýzei», «Úzdik ánshi», «Úzdik aspapshy», «Úzdik bishi», «Úzdik oblystyq mádeniet mekemesi» atalymdary boiynsha da top jarǵandar anyqtaldy. Atap aitqanda, «Úzdik oblystyq mádeniet mekemesi» nominatsiiasyn usta Dárkembai atyndaǵy qolóner mýzeii jeńip aldy, mýzeige júlde syiy retinde «Lada Granta» avtokóliginiń kilti tapsyryldy. «Úzdik bishi» – Ile aýdanynyń «Sarmat» bi ansambliniń jetekshisi Ashat Jamansariev, «Úzdik aspapshy» – Súiinbai atyndaǵy oblystyq filarmoniianyń aspapshysy Aibol Qudaibergen, «Úzdik ánshi» – Kerbulaq aýdany Kúreńbel folklorlyq-etnografiialyq án-bi ansambliniń ánshisi Azamat Úmbetovke berildi. Jeńimpazdarǵa arnaiy statýetka, diplom jáne 100 myń teńge aqshalai syilyq berildi.
Sonymen qatar shara barysynda «Rýhani jańǵyrý» baǵdarlamasy aiasynda jaryq kórgen «Jetisý óńiriniń halyq jáne halyq kompozitorlary ánderiniń antologiiasy» jinaǵynyń tusaýy kesildi.
Kitap qazaq halqynyń ǵuryptyq ánderi, halyq ánderi jáne halyq kompozitorlarynyń ánderi atty 3 bólimnen turady. Jinaqqa jalpy sany 250-ge jýyq án kirgen. Oqýlyqtyń taǵy bir ereksheligi –jinaqqa engen barlyq ánder arnaiy CD-diskilerge jazylyp, kitapqa qosa tirkelgen.
«Jetisý óńiriniń halyq jáne halyq kompozitorlary ánderiniń antologiiasy» kitabyn basyp shyǵarýǵa jergilikti biýdjetten 5 mln teńge bólingen. Onyń tirajyn 150 dana shyǵarý josparlanyp otyr.
Eske salaiyq, byltyr «Jetisý kitaphanasy» 100 tomdyǵy seriiasynyń aiasynda 20 avtordyń kitaby jaryqqa shyqsa, biylǵy jyly 40 kitap basylady dep josparlanǵan. Onyń ishinde 20 dana kitap jas aqyndardyń jinaǵy jáne «Mádeni eskertkishter entsiklopediiasy» 2 tomdyq kitaby da bar.
Baljan JUMANBEKOVA
