Onda 2018 jyldyń 4 aiyndaǵy áleýmettik-ekonomikalyq damý qorytyndylary men II toqsanǵa arnalǵan mindetter jáne 2017-2018 jyldardaǵy jylytý maýsymynyń qorytyndysy men 2018-2019 jyldardaǵy jylytý maýsymyndaǵy mindetter týraly máseleler qaraldy, - dep habarlaidy Almaty oblysy ákiminiń baspasóz qyzmeti.
Birinshi másele boiynsha oblys ákiminiń orynbasary Jeńis Tuiaqov baiandama jasady. Baiandamashynyń aitýynsha, óńirde ónerkásip óndirisiniń kólemi 249,8 mlrd. teńge bolyp, naqty kólem indeksi – 104,2% qurady. Jańa 11 nysan iske qosylyp, qoldanystaǵy 5 óndiris keńeitilgen, qosymsha 278 jumys oryndary ashyldy.
Aýyl sharýashylyǵynda 10,8 myń jeke sharýa qojalyqtaryn biriktirý arqyly 50 aýyl sharýashylyǵy kooperativterin qurý josparlanýda, onyń ishinde 362 JShQ tartylyp, 7-ýi quryldy. Qant qyzylshasy boiynsha 7 servistik-daiyndaý ortalyǵy ashyldy, 1,5 mlrd. teńgege 132 birlik aýyl sharýashylyǵy tehnikasy satyp alyndy. Et óndirisi – 4,7%-ke, sút – 2,1%, jumyrtqa 4,1%-ke artty. Oblys boiynsha 83 bordaqylaý alańy men 64 sút-taýarlyq fermasy jumys jasaidy, olardyń júktemesi sáikesinshe 71% jáne 85,4%.
Jumys istep turǵan shaǵyn jáne orta biznes sýbektileriniń sany 1,4%-ke artyp, 113,2 myń birlikti qurady, jumyspen qamtylǵandar sany – 235,7 myń adam nemese jumyspen qamtylǵan halyqtyń – 24%. 4 aida ShOB sýbektilerinen biýdjetke 27,8 mlrd. teńge túsip, jergilikti biýdjettiń jalpy kólemindegi úlesi 39,7%-ten 47,9%-ke deiin artty. Biylǵy jyly kásipkerlikti qoldaýǵa barlyǵy 7,8 mlrd. teńge bólindi, onyń ishinde «Biznestiń jol kartasy – 2020» aiasynda – 3 mlrd. teńge qarastyryldy. Nátijeli jumyspen qamtýdy jáne jappai kásipkerlikti damytý baǵdarlamasy boiynsha shaǵyn nesielendirýge jáne oqytýǵa 4,3 mlrd. teńge bólindi.
Baiandamany tyńdaǵan oblys ákimi A. Batalov áleýmettik-ekonomikalyq damýdaǵy jetken jetistiktermen qatar oryn alyp otyrǵan olqylyqtar men tómen kórsetkishke ie bolǵan aýdan, qalalardyń atyn atap, jumystaryna baǵyt berý kerektigin qadap aitty. Elbasynyń oblysqa kelgen saparynda bergen tapsyrmalaryn, sonyń ishinde aýdandar damýyndaǵy disproportsiiany boldyrmaý máselesin de árbir aýdan, qala ákimderi mindetine alýy kerektigin tilge tiek etti. Munan soń oblys basshysy jaryssózge Eskeldi aýdanynyń ákimi Baǵlan Tánekenovti shaqyryp, odan aýdanda qolǵa alynatyn jańa bastamalary týraly surady. B. Tánekenovtiń aitýynsha, aýyl sharýashylyǵynda jalpy sany 1250 basqa arnalǵan 3 sút taýarly ferma ashý josparlanyp otyr. 500 tonnalyq 2 jemis-jidek saqtaý qoimasynyń da qurylysy júretin bolady. Qarabulaq aýylynda sheteldik investorlardyń qatysýymen soia óńdeitin zaýyt salý mejelengen. Sondai-aq 2019 jyly Shaja ózeninde 290 MVt-tyq GES iske qosý jobalanýda.
Munan soń oblystyq bilim basqarmasynyń basshysy Dáýren Júnisov sóz aldy. Ol óz sózinde bilim sapasyn arttyrý, salany tsifrlandyrý, atap aitqanda kompiýterlendirý, mektepterdegi internet jelisiniń sapasyn arttyrý, balalardyń jazǵy demalysyn uiymdastyrý máselelerine qatysty baiandady.
Oblys ákimi A. Batalov jaryssózge jańadan taǵaiyndalǵan basshylardy shaqyrǵany beker emestigin aitty. «Jańa basshy óz salasyn, óz aýdanyn alǵa bastyrýda, qordalanǵan máselelerin sheshýde jańasha baǵyt, tyń bastamalaryn kórsetýi kerek», – dedi oblys basshysy.
Ekinshi másele boiynsha baiandama jasaǵan oblys ákiminiń orynbasary Aidarbek Baijanov jylytý maýsymynyń daiyndyq jumystaryna jáne ótkizýge bólingen 6 mlrd. teńge tolyǵymen igerilip, josparlanǵan is-sharalar atqarylǵanyn atap ótti. 32 qazandyqqa, 56,5 shaqyrym jylý júiesine, 94,7 shaqyrym sý qubyry-káriz júiesine jáne 13,6 myń shaqyrym elektr jelilerine jóndeý júrgizildi. Jylytý maýsymyna 2246 biýdjettik sala nysany, onyń ishinde: bilim berý salasynda – 1002, densaýlyq saqtaý – 664, áleýmettik salada – 580 nysan jáne 1687 kópqabatty turǵyn úi daiyndaldy. 2017 jyly Ulttyq qordan 1,5 mlrd. teńge bólinip, «Qapshaǵaijylý» MKK-nyń ǵimaratyn jańǵyrtý jumystary bastaldy. Sol siiaqty «Monoqalalardy damytý – 2020» baǵdarlamasy aiasynda Tekeli qalasyndaǵy «Alataý» jáne «Dostyq» shaǵyn aýdandarynyń jylý júielerin jańǵyrtý jumystaryna 1,4 mlrd. teńge bólinip, nátijesinde 12,5 shaqyrym jylý jelileri jóndelgen.
A. Baijanov qazirden qolǵa alynýy tiis kómir tapshylyǵyn boldyrmaý sharalaryn qabyldaý, suiyq otynnyń qoryn daiyndaý, iesiz elektr jelilerin kommýnaldyq menshikke ótkizý, debet qaryzdardy óteý siiaqty kóptegen máselelerdi aýdan, qala ákimderi men tiisti basqarma basshylary ýaqytyly oryndaýy qajettigin basa aitty .
Jiyndy qorytyndylaǵan oblys ákimi A. Batalov:
– Jalpy oblystyń búgingi ekonomikalyq ósimi jaman emes - 4,2 % qurap otyr. Elbasy oblysqa kelgen saparynda jumysymyzǵa oń baǵa berdi, sonymen qatar jańa mindetter júktedi. Prezident tapsyrmalaryn júzege asyrýdyń is-sharalar josparyn ázirlep, sonyń negizinde jumys jasaýymyz kerek. Biylǵy jyly shaǵyn jáne orta bizneste ashylýy tiis 100 jańa nysannyń árqaisysyn aýdan ákimderi jatqa bilýi kerek. Qurylys kólemi 137 %-dy qurap otyr, biraq men bul biz úshin ol jetkiliksiz dep esepteimin, sondyqtan Prezidenttiń 7.20.25 baǵdarlamasynyń aiasynda qurylys qarqynyn ósirýimiz kerek. Jylytý maýsymyna daiyndyq boiynsha ortalyqtandyrylmaǵan jylytý júiesine qosylmaǵan Talǵar aýdanyndaǵy kóp qabatty úilerdiń, sonymen qatar Qarasai, Jambyl aýdandaryndaǵy osyndai úilerdiń máselesin sheshýge jumys isteńizder, – dedi.
Otyrys sońynda ótken jylǵy jylytý maýsymynyń qorytyndysy boiynsha úzdikter marapattaldy. Atap aitqanda, 1 oryndy Qapshaǵai qalasy, ekinshi oryndy Raiymbek aýdany jáne qos 3-oryndy Sarqan aýdany men Tekeli qalasy ielenip, olarda arnaiy tehnikalar tartý etildi. Sonymen qatar jylý, energetika salasy mekemeleriniń birqatar qyzmetshilerine oblys ákiminiń alǵys hattary men qurmet gramotalary berildi.
Almaty oblysy ákiminiń baspasóz qyzmeti
