Almaty oblysy Eńbekshiqazaq aýdanynyń bilim bóliminde eńbek etken Zarima Qojmambetova ádildikke jete almai júr, - dep habarlaidy Dalanews.kz.
Jýrnalist Ońǵar Qabdenniń sózinshe, bilim bóliminiń mamanyn ákesi qaitys bolǵanda, áriptesteri bataǵa jinaǵan 40 myń teńge úshin sot 1 jarym million aiyppul salyp, jumystan bosatqan.
«Almaty oblysy Eńbekshiqazaq aýdanyna qarasty Esik qalasynda ornalasqan №2 sot qaitys bolǵan adamǵa jinalǵan aqsha úshin 1 jarym million aiyppul salǵan. Aýdandyq bilim bóliminde tárbie jónindegi bas maman bolyp jumys isteitin Qojmambetovanyń ákesi Qojmambetov A.M 2023 jyldyń 26 qarashasynda aýyr naýqastan (raktan) qaitys bolady.
Zarimanyń áriptesteri, aýdandyq tárbie mamandary qazaqtyń jón joralǵysymen qaitys bolǵan adamnyń úiine kelip, kóńil aitýmen qatar «az da bolsa kómek bolsyn»- dep, 3000-5000 teńge arasynda qarajattardy Zarimanyń kaspi gold kartasyna aýdarady. Eń qyzyǵy, bata jasamaǵan bir top muǵalim Antikorǵa aryzdanǵan», - dep jazdy jýrnalist.
Málimetke súiensek, aryzdy teksergen Almaty oblystyq sybailas jemqorlyqqa qarsy agenttiginiń qyzmetkeri osy isti segiz ai tergep, qylmys quramy joq (dáleldenbegendikten) dep, quqyq buzýshylyqtyń bar joǵyn anyqtaý úshin sotqa jiberedi.
«Aryzdanǵan adamdardyń eshqaisynan Z-nyń bank kartasyna aqsha túspegen. Sot 22. 07.2024 jyly ákimshilik quqyqbuzýshylyq boiynsha Almaty oblysy Eńbekshiqazaq aýdany №2 sotynda sýdia Sýltanova Ainýr Perdekojaevnanyń basshylyǵymen bilim bóliminiń senimdi ókili Diýsembaeva Galiia Mýratbekqyzy (ómiri bilim bóliminde jumys istemegen múlde tanymaityn tulǵa) A. Baitursynov mektebiniń tárbie mamany Qumarbekova Sáýlemen birge Qojmambetovanyń qatysýymen onlain sot ótedi. Sot bir jaqty sheshim qabyldap, qylmys quramy dáleldenbegen, tárbie mamany Zarimanyń aqsha suraǵan, nemese bopsalaǵan bir aýyz sóz nemese jazbasy joqtyǵyna qaramastan Zarimaǵa 1 mln 550 myń 640 teńge shtraf salady. Aryzdanǵan adamdar eshqaida jumys istemek túgili, kim ekeni belgisiz, tirkeýde joq kisiler bolyp shyqqan. Sotqa kýágerlikke kelgen 20 tárbie jónindegi orynbasardy sýdia sotqa qatystyrmai qoiǵan!» - dedi ol.
qaz365.kz málimetinshe, Zarima Qojmambetova Astanaǵa kelip, ádildik izdep júr. Isti bolǵan ol sotqa zańsyz tartylǵanyn málim etip, Astanadaǵy shendilermen kezdesýge barǵan.
«25 qyrkúiek kúni meni jumystan jalamen shyǵaryp jiberdi. Munda kelgen sebebim – jumysqa qaita turýym kerek. Men Eńbekshiqazaq aýdanynyń Bilim bóliminde osy ýaqytqa deiingi bolyp jatqan qylmystardyń bárin alyp keldim. Sonyń bárin kórsetemin. Qazirge deiin Bilim bóliminde ártúrli quityrqy ister júrip jatyr. Atap aita alamyn! …Osy kúnge deiin qylmystaryn aitqanym úshin maǵan jala jabylyp otyr», – deidi ol.
Endi qaitadan jumysqa ornalasý úshin Zarima Qojmambetova Oqý-aǵartý ministri Ǵani Beisembaevpen kezdesip, másele kótergisi keledi.
