Qarıany tól merekesimen quttyqtaý úshin oblys ákimi Marat Eleýsizuly Eńbekshiqazaq aýdany Alǵa aýylyna arnaıy bardy.
Syı-qurmetin kórsetken oblys basshysy 98 jastaǵy aqsaqalǵa kózsiz erligi úshin alǵys bildirdi.
– Sizder qaqqan Jeńistiń temirqazyǵy táýelsiz eldiń tuǵyrynyń berik ári bıik bolýyna sep boldy. Búgingi kúngi mamyrajaı tirlik keshýimiz ózderińiz syndy ardagerlerdiń surapyl soǵys jyldary kórsetken batyldyǵynyń arqasy. Ár maıdangerdiń mańdaıynan shyqqan terine, janyn qıǵan erligine qaryzdarmyz. Sizderdi ulyqtaý tutas ultqa paryz, – dedi aımaq basshysy Marat Sultanǵazıev.
Óz kezeginde Soltanbaı aqsaqal, elep eskerip kelgen óńir ákimine rızashylyǵyn bildirip, batasyn berdi.
– Mereke kúni umyt qaldyrmaı arnaıy kelgenińizge rahmet aıtamyn. Biz úshin budan asqan qurmet joq. Zamanymyz tynysh, aspanymyz ashyq bolsyn, – dedi qart maıdanger.
Aıta keteıik, Soltanbaı Jaryqbasov 1925 jyly ómirge kelgen. Ol 1943 jyldyń qańtarynda Tashkenttegi mergender kýrsynda oqyp, sáýir aıynda áskerge attanǵan.
Japondyqtarǵa qarsy soǵysqan Soltanbaı Jaryqbasov Zabaıkal maıdanyndaǵy 25-shi qyzyl týly mehanıkalandyrylǵan brıgadanyń quramynda 1-shi batalónynyń, 1-shi rotasynyń pýlemet bólimshesiniń komandıri bolǵan.
UOS ardageri, 1 dárejeli «Otan soǵysy» ordeniniń ıesi. Sonymen qatar, 1941-1945 jyldardaǵy Uly Otan soǵysyndaǵy Jeńistiń mereıtoılyq, merekelik medaldarymen marapattalǵan.
