Áleýmettik jelide Almaty oblysy Ile aýdanyndaǵy “Ile sý” kommýnaldyq sharýashylyǵy mekemesine qatysty eńbek zańnamasynyń buzylýy jóninde anonimdi shaǵym tarady. Atalǵan máselege bailanysty mekeme basshysy Jandos Jýrynov túsinikteme berdi, dep habarlaidy Dalanews.kz.
Máseleniń mán-jaiy
Instagram jelisindegi “gres_big_family” paraqshasynda Almaty oblysy Ile aýdany Ótegen batyr kentinde ornalasqan “Ile sý” kommýnaldyq sharýashylyǵy mekemesinde qyzmetkerlerdiń jalaqysy ýaqytyly tólenbeitini, eńbekaqy mólsheriniń turaqsyz ekeni jáne quqyqtarynyń saqtalmai otyrǵany jóninde shaǵym jariialanǵan.
Atalǵan máselege qatysty “Ile sý” mekemesiniń direktory Jandos Jýrynov pikir bildirdi. Onyń aitýynsha, qazirgi tańda prokýratýra tarapynan resmi tekseris bastalǵan.
“Prokýratýraǵa barlyq qajet qujattardy usyndyq. Tekseris endi bastaldy, shamamen bir apta boldy. Qorytyndy shyqqan soń tolyq aqparat berýge daiynbyz”, – dedi ol.
Direktor shaǵymda kórsetilgen aqparattardy joqqa shyǵardy. Onyń sózinshe, jalaqynyń uzaq merzimge keshigý faktisi tirkelmegen.
“Jalaqy keide 5–6 kúnge keshigýi múmkin. Biraq 2–3 ailap keshiktirildi degen aqparat shyndyqqa janaspaidy”, – dedi Jýrynov.
Sondai-aq ol jalaqynyń ártúrli tólenýi burynǵy basqarý kezeńindegi sheshimdermen bailanysty ekenin aitty.
Anonim shaǵymdardyń artynda múddeli toptar bolýy múmkin
Jandos Jýrynov anonim túrde taraǵan aqparattarǵa da toqtaldy. Onyń pikirinshe, mundai shaǵymdardyń artynda belgili bir múddeli toptar turýy múmkin.
“Bul aqparattardy jazyp otyrǵan adamdar burynǵy kezeńdegi sheshimderge qatysy bar bolýy múmkin. Óz áreketterin jasyrý úshin túrli aqparat taratyp jatyr”, – dedi ol.
Qazirgi ýaqytta tekseris jalǵasyp jatyr. Direktor atalǵan másele boiynsha naqty qorytyndy resmi tekseris aiaqtalǵannan keiin jariialanatynyn jetkizdi.
