Memleket paıdasyna tárkilenýge jatatyn Volvo júk kóligi tonaldy jáne Mercedes avtokóligi jasyrylǵan, dep habarlaıdy Dalanews.kz.

Almaty oblysy prokýratýrasymen júrgizilgen tekserý nátıjesinde aıyp turaǵyndaǵy tárkilenýde turǵan múlikterdi tonaý faktisi anyqtaldy.  

Atap aıtqanda jalpy quny 100 mln teńgeden astam turatyn «Volvo FH» markaly júk kóligi ákimshilik is boıynsha tárkilenip, memleket kirisine óndirilýi kerek bolǵan. Alaıda saqtaýda turǵan kezde atalǵan júk kóligi bólshektelip, urlanǵan.

Sonymen qatar, tárkilenýge jatatyn basqa da múlikti jasyrý faktisi ashyldy.  Qylmystyq is aıasynda quny 8 mln teńge bolatyn «Mercedes E350» markaly kólik kúdiktiniń ákesine saqtaýǵa berilgen. Keıinnen sot bul kólikti memleket paıdasyna óndirý týraly sheshim shyǵarǵan.  

Biraq sottyń sheshimine qaramastan, kúdiktiniń ákesi saqtaý mindetin oryndaýdan bas tartyp, kólikti jasyryp qoıǵan.  

Anyqtalǵan buzýshylyqtar týraly sotqa deıingi tergeý organdaryna túpkilikti sheshim qabyldaý úshin qujattar joldandy.