Qarasaı aýdanynda sport jáne estrada juldyzdarynyń qatysýymen erekshe fýtbol machy ótti, dep habarlaıdy Dala News.
Jasyl alańda el namysyn álemdik jarystarda qorǵap júrgen chempıondar men darynymen daralanǵan óner ıeleri básekege tústi. Buǵan deıin bolmaǵan erekshe kezdesýdi tamashalaý úshin stadıonǵa 3000-nan astam jankúıer jınaldy.
Sharanyń basty maqsaty – kimniń myqty ekenin anyqtaý emes, kórermenge kóterińki kóńil-kúı, jarqyn emosıa syılaý boldy. İs-shara «Biz jańa Konstıtýsıany qoldaımyz» uranymen «Ádiletti ári progresıvti Qazaqstannyń Halyq Konstıtýsıasy úshin» óńirlik jalpyulttyq koalısıanyń qoldaýymen uıymdastyryldy.
«Komandalyq oıynda da, jalpy ómirde de jeńiske tek erik-jiger men birlik jeteleıdi. Bul mach – tek sporttyq saıys emes, jańa Konstıtýsıa boıynsha ótetin referendýmdy qoldaýǵa baǵyttalǵan ıgi shara», – óńirlik koalısıa basshysy Qýat Baıǵojaev.
Fýtbol alańynda eki komanda baq synasty. «Qonaev» komandasynda balýandar - Parıj Olımpıadasynyń júldegeri Demeý Jadyraev, Beıjiń Olımpıadasynyń kúmis júldegeri Nurbaqyt Teńizbaev, London Olımpıadasynyń qola júldegeri Aqjúrek Tańatarov, álem chempıonatynyń júldegerleri – Nurjan Jumajan, Erbol Qońyratov, Qorlan Jaqansha, aıtysker aqyn Syrym Áýeshan, «Qonaev media» telarnasynyń júrgizýshisi Qosqanat Kópjasar jáne ózge de tanymal azamattar óner kórsetti.
Al olarǵa qarsy «Alataý» komandasy alańǵa shyqty. Onyń sapynda estrada ánshisi Jubanysh Jeksen, «SuperStar KZ» jobasynyń jeńimpazy Nurjan Kermenbaev, tanymal kınoakter Táýekel Músilim, belgili bloger Azat Jumadil jáne basqa da óner ıeleri boldy.
Oıyn tartysty ári qyzyqty ótti. Qatysýshylardyń jaqsy daıyndyqpen kelgeni baıqaldy. Árbir shabýyl men ádemi gol jankúıerlerdiń qyzý qoldaýyna ıe boldy.
«Fýtboldy bala kezimnen jaqsy kóremin. Qazir de bul sport túrimen turaqty aınalysamyn. Sport adamdy sergek ustap, fızıkalyq formasyn saqtaýǵa kómektesedi. Mundaı is-sharalar salaýatty ómir saltyn ustanýdyń jáne belsendi azamattyq ustanymnyń qoǵam ómirindegi mańyzdylyǵyn taǵy bir márte aıqyndaıdy», – dedi akter Táýekel Músilim.
Jarys nátıjesinde 2:1 esebimen «Qonaev» komandasy jeńiske jetti. Oıyn sońynda kórermenderge konserttik baǵdarlama usynylyp, stadıon merekelik kóńil kúıge bólendi.
