Bul týraly «Jetisy Media» aqparattyq alańynda ótken baspasóz-máslihatynda belgili boldy.
Ata-ananyń nazarynan tys qalǵan balalar tilsiz jaýdyń da qursaýynda qalyp jatqany jii kezdesýde. Máselen, aǵymdaǵy jyldyń 24 mamyrynda Qapshaǵai sý qoimasynda jedel-qutqarý jasaǵynyń qutqarýshylary patrýldeý kezinde №6 qalalyq jaǵajai aýdanynda sýǵa batyp bara jatqan bir top adamdy baiqaidy. Jedel júrgizilgen qutqarý jumystarynyń nátijesinde jaǵalaýǵa 2002-2004 jyldary týǵan 5 jas jetkizilgen. Olardyń biri es-tússiz kúide bolyp, jedel járdem qyzmetkerleriniń kómegine júgingen.
Ókinishke orai, bala qaýipsizdigi dep dabyl qaqqanymen, búldirshinder oqys oqiǵaǵa tap bolýda. Máselen, jyl basynan balalardyń otpen oinaýynyń saldarynan 44 órt oqiǵasy tirkelgen. Bul ótken jylmen sanaǵanda 28-ge kóp.
Qyzyl jalynnyń sharpýynyń aldyn alý sharalary turaqty negizde júzege asyrylýda. Ásirese, jaz mezgili bastalǵandyqtan, mektep jasyndaǵy balalar demalystaryn lagerlerde ýaqyt ótkizedi. Osyǵan bailanysty, oblystaǵy jazǵy lagerlerde tekseris sharalaryn júrgizý josparlanǵan.
«Lagerlerdiń órtke qarsy qaýipsizdigin tekserý jumystary mamyr-maýsym ailarynda ótkiziledi. Josparǵa sáikes, 8 nysandy aralaý kózdelgen. Búgingi kúni onyń 6-y tekseristen ótti. Endi ekeýi qaldy. Atalǵan nysandar Talǵar, Tekeli, Eskeldi aýdandarymen Qaskeleń qalasynyń mańynda ornalasqan»,-deidi Memlekettik órt baqylaý basqarmasynyń bastyǵy,azamattyq qorǵaý podpolkovnigi Dáýren Azamatov.
Aita keteiik, jazǵy demalys kezinde balalar eresekter tarapynan baqylaýsyz qalady. Ata-analar balalardyń qaýipsizdigine erekshe nazar aýdarýy qajet. Balanyń eresekterdiń qaraýynsyz qalýy qaiǵyly jaǵdailarǵa ákelýi múmkin.
