Sý resýrstary jáne irrigatsiia ministrliginiń baspasóz qyzmeti Almaty oblysy Ile aýdanynda sý tapshylyǵy saldarynan 100 gektar egis alqabynyń qurǵap jatqany týraly aqparatty belgili bir deńgeide joqqa shyǵardy, dep habarlaidy Dalanews.kz.
"Aqshi aýylynda sý tapshylyǵy saldarynan 100 gektar egis alqabynyń qurǵap jatqany týraly buryn taraǵan aqparattyń shyndyqqa janaspaityny anyqtaldy. Al, shyn máninde, "Qazsýshardyń" "D.Qonaev atyndaǵy Úlken Almaty kanaly" filialymen sý jetkizý boiynsha kelisimsharttary bolmaǵandyqtan, 9 gektar jer sýarylmaǵan", delingen Sý resýrstary jáne irrigatsiia ministrligi baspasóz qyzmetiniń habarlamasynda.
Jumysshy toby atalǵan eldimekenge sý Kúrti sý qoimasynan Oń jaǵalaý magistraldyq kanaly arqyly jetkiziletinin naqtylady. Sýarý maýsymy 16 mamyrda bastalǵan. Al D.Qonaev atyndaǵy Úlken Almaty kanalynyń filialy sáýir aiynyń aiaǵynda sharýalardy kelisimshartqa otyrýǵa shaqyra bastaǵan.
Mamyr aiynyń basynda Kúrti sý qoimasyndaǵy sý kólemi 101,68 mln tekshe metr boldy. Búginge deiin Oń jaǵalaý magistraldyq kanaly arqyly 3,6 mln tekshe metr sý berildi, Sol jaǵalaý magistraldyq kanaly arqyly 6 mln tekshe metrden astam sý berildi.
"Sý berý jumystarynyń keleshekte keshigýine jol bermes úshin jumys tobynyń ókilderi filialǵa sýarý maýsymy bastalmai turyp, sý berý jóninde kelisimsharttar jasasýdy usyndy. Sondai-aq kanaldardy mehanikalyq ádispen tazartý máselesi qarastyrylyp jatyr. Jergilikti atqarýshy organdarmen tyǵyz bailanysta jumys isteý, fermerlerge tarif qoiý, sýdy utymdy paidalaný, sharýashylyq ishindegi kanaldardy aldyn ala tazartý, egistik ainalymyn qoldaný jáne sý kóp qajet etetin daqyldardyń egisin azaitý máselelerin belsendi túrde túsindirý qajet ekeni aityldy, – dedi Balqash-Alakól basseindik inspektsiiasynyń basshysy Serik Meirambekov.
