Alakól aýdany óńirdegi eń shalǵai jatqan aýdandardyń biri jáne aýyl azamattary men kásipkerlerdiń bastamalaryn belsendi qoldaýdy qajet etetin aimaq bolyp tabylady.
Búgingi tańda aýdan ortalyǵy Úsharal qalasynda «Bastaý» jobasy boiynsha oqytý bastalyp ketti. Birinshi aǵymǵa 36 adam oqýǵa qabyldandy. Bastaýlyqtarmen alǵashqy kezdesýlerdiń biri Óńirlik keńes múshesi, kásipker Barshagúl Saiatova men Almaty oblysy Kásipkerler palatasynyń direktory Nariman Ábilshaiyqovpen uiymdastyryldy.
«Ótken jyly «Bastaý» jobasy oblysymyzdyń jeti aýdanynda júzege asyrylyp, kútken nátijelerimiz oryndaldy. «Bastaý» kóptegen jumyssyz júrgen adamdarǵa óz isin ashyp, kásipkerlikpen ainalysýǵa túrtki boldy. Sonyń nátijesinde eldimekenderde jańa biznes nysandary men qosymsha jumys oryndary paida boldy», – dedi Nariman Ábilshaiyqov.
Óz kezeginde Óńirlik keńes múshesi Barshagúl Saiatova biznes qurý jolymen bólisip, jeke isti ashý kezinde qajet bolatyn keńestermen bólisti.
– Men úshin bul alǵashqy kásipkerlik tájiribe bolaiyn dep tur. Sondyqtan, biznes-jospar ázirleýdi, marketing negizderin úirengim keledi. Bizdiń aýylymyz mal sharýashylyǵymen ainalysýǵa óte qolaily meken. Sol sebepti onda shaǵyn ferma ashyp, 3-4 adamdy jumyspen qamtýdy josparlap otyrmyn, – deidi Áliia Kenjesarieva.
Biznes-trener Arlan Álimbaevtyń aitýynsha, qazirgi tańda qatysýshylar kásipkerlik, biznes ideia týraly túsiniktermen jiti tanysyp jatyr. Jaqyn ýaqytta iri ónerkásip kásiporyndary men qyzmet kórsetý oryndarynda tájiribelik sabaqtar ótip, tabysty kásipkerlermen kezdesýler uiymdastyrylady.
Aita keteiik, «Bastaý» jobasy osy aptada Almaty oblysynyń 16 aýdan ortalyǵynda bastaldy. Jalpy biyl óńirde oqytýmen 3,3 myńnan astam adamdy qamtý jospalanyp otyr.
