Memlekettik marapatty saltanatty túrde Ishki ister ministri Erlan Turǵymbaev tabystady. Maior Amanbaevtyń erligi qyzmettik boryshyn oryndaýda kórsetken batyldyǵy úshin is júzinde atalyp ótti. Erjúrek ofitser Almaty oblysy Tekeli qalasynyń politsiia basqarmasynda ýchaskelik politsiia inspektorlary qatarynda qyzmet etedi.
"Bul marapat politsiia qataryndaǵy qyzmette quqyqtyq tártip pen azamattarymyzdyń tynyshtyǵyn qamtamasyz etý maqsatynda odan ári jańa jeńisterge jetýge yntalandyra túsedi. Óz Otanymnyń igiligi úshin adal, ári múltkisiz qyzmetimmen men qoǵamǵa kóp paida ákele alatynyma senimdimin. Politsiia qatarynda árdaiym azamattarǵa kómekke kelýge jáne qylmysqa qarsy turýǵa daiyn óz isiniń naǵyz sheberleri qyzmet etedi", - deidi Erbol Amanbaev.
Esterińizge sala keteiik, ýchaskelik politsei ótken jyldyń qarasha aiynda batyldyǵymen erekshe kózge túsken. Ol kórshi úidegi órt týraly kórshisiniń habarlamasyna tez arada áreket ete otyryp, kóp páterli turǵyn úiden qart áieldi alyp shyǵyp, qyzǵan gaz ballondardy syrtqa shyǵarǵan. Jarylys qaýpin joiý jáne ottyń odan ári taralýyn boldyrmaý maqsatynda, órt oshaǵyn joiǵan batyl politseidiń qoldaryn kúiik shalǵan. Alaida,ol qatty aýyrsynýdy sezinbesten, otty sóndirýdi jalǵastyryp, áriptestermen birge úi turǵyndaryn evakýatsiialaǵan.
Búgin tártip saqshysynyń barlyq týǵan-týystary, jaqyndary jáne tanystary, jergilikti jastar ony naǵyz batyr, ári batyl ofitser retinde qurmetteidi. Óziniń erekshe is-áreketimen qarapaiym politsei óskeleń urpaq úshin erliktiń jarqyn úlgisin kórsetti.
"Meniń ornymda kez-kelgen adam osyndai is-áreketke baratyn edi. Eger dál osyndai jaǵdai taǵy qaitalanatyn bolsa, esh oilanbastan osy is-áreketimdi qaita jasar edim", - dedi politsiia qyzmetkeri.
