Almaty oblysyndaǵy Kókózek aýylynda 6 jasar balany kólikpen qaǵyp, oqiǵa ornynan boi tasalaǵan azamattyń buryn politsiiada qyzmet etken adam ekeni anyqtaldy, dep habarlaidy Dalanews.kz 31 arnanyń Informbiýro jańalyqtar qyzmetine silteme jasap.
Beinebaqylaý kamerasyndaǵy jazbadan velosiped mingen balanyń artqa sheginip kele jatqan kóliktiń astyna túsip qalǵany kórinedi. Júrgizýshi kólikten túspesten birneshe minýt kóliginde otyryp, keiin esh áreketsiz ketip qalǵan. Al jaraqat alǵan bala ornynan turyp, qatty jylaǵan kúii kóp uzamai esinen tanyp qulap túsedi. Jergilikti turǵyndar oǵan alǵashqy kómek kórsetken.
Kúdiktiniń ýchaskelik inspektor qyzmetin atqarǵany belgili boldy. Onyń kólikti mas kúide basqarǵan-basqarmaǵany tekserilip jatyr. Jol apatynan zardap shekken bala qazirgi ýaqytta aýrýhanada em qabyldap jatyr.
“Jedel izdestirý sharalary nátijesinde Lexus RX 300 avtokóligin basqarǵan 42 jastaǵy azamat ustaldy. Ol ýaqytsha ustaý izoliatoryna qamaldy. Atalǵan adam politsiia qyzmetkeri emes – ol jol apatyna deiin teris sebeptermen ishki ister organynan jumystan bosatylǵan. Qazir osy oqiǵaǵa bailanysty keshendi tergeý amaldary júrgizilýde”, – dedi Almaty oblysy politsiia departamentiniń resmi ókili Merýert Moriakova.
