Mektep túlekterin quttyqtaǵan Amandyq Batalov oqýshylar ózderiniń talapshyldyǵy men izdenimpazdyǵynyń arqasynda ómir boiyna azyq bolar eń qundy bailyq bilimin tolyqtyryp, búgin jetistikter jolyna qadam basyp otyrǵanyn aitty. Bul oraida ata-analar men muǵalimderdiń eńbegin de atap ótti.
– Sizder álemge Táýelsiz Qazaqstan dep tanylǵan memlekette týyp-ósý, el damýymen birge bilim alý baqyty buiyrǵan urpaqsyzdar. Bul sizderge maqtanyshpen qatar zor mindetter júkteidi, – dep atap ótti oblys ákimi. Budan soń óńir basshysy sózin ári sabaqtap: – Búgingi kúni óskeleń urpaqtyń tereń bilim men tálimdi tárbie alýyna búkil eldegidei óńirimizde qolaily jaǵdai jasalyp otyr. Soǵan sáikes ardaqty ustazdardan alǵan sapaly bilim men sanaly tárbie arqasynda, el senimin aqtap, qasietti Otanymyzdyń naǵyz patriottary bolatyndaryńyzǵa senemin. Adamzat balasy ómir boiy bilim alady. Óitkeni, bilim – taýsylmas qazyna, baǵa jetpes bailyq. Sizderden jańalyqqa jany qumar, álem órkenietine jaqyn, ozyq oily jastar retinde úlken úmit kútemiz. Saparlaryńyz sátti bolsyn! – dei kele, A. Batalov túlekterdi marapattaý rásimine kóshti. Úzdikterdiń keýdesine «Altyn belgi» taǵyp, planshetter syiǵa tartty.
Saltanatty sharada oblystyń úzdik oqýshylarynyń atynan Taldyqorǵan qalasyndaǵy úsh tilde oqytatyn daryndy balalarǵa arnalǵan №20 mektep litseiiniń túlegi Asyljan Balatursynov pen Ile aýdanyndaǵy M. Maqataev atyndaǵy № 13 mekteptiń túlegi Arýjan Tólebekova sóiledi. Kórsetilgen qoldaýlarǵa alǵystaryn aita otyryp, ózderine artylyp otyrǵan senimniń údesinen shyǵatyndaryna senidirgen túlekter eldiń igligi úshin bilim alyp, eńbek etýge sóz berdi.
Bitirýshiler úshin estrada ánshileri óner kórsetip, «Bilim sharlary» ushyryldy. Ádemi kesh kontserttik baǵdarlamamen qorytyndylandy.
Jalpy Almaty oblysynda 14 268 túlek mektep bitirip, sonyń 590-y «Altyn belgi» tósbelgisine, 528 túlek úzdik attestatqa ie boldy.
Almaty oblysy ákiminiń baspasóz qyzmeti
