مەكتەپ تۇلەكتەرىن قۇتتىقتاعان اماندىق باتالوۆ وقۋشىلار وزدەرىنىڭ تالاپشىلدىعى مەن ىزدەنىمپازدىعىنىڭ ارقاسىندا ءومىر بويىنا ازىق بولار ەڭ قۇندى بايلىق ءبىلىمىن تولىقتىرىپ، بۇگىن جەتىستىكتەر جولىنا قادام باسىپ وتىرعانىن ايتتى. بۇل ورايدا اتا-انالار مەن مۇعالىمدەردىڭ ەڭبەگىن دە اتاپ ءوتتى.
– سىزدەر الەمگە تاۋەلسىز قازاقستان دەپ تانىلعان مەملەكەتتە ءتۋىپ-وسۋ، ەل دامۋىمەن بىرگە ءبىلىم الۋ باقىتى بۇيىرعان ۇرپاقسىزدار. بۇل سىزدەرگە ماقتانىشپەن قاتار زور مىندەتتەر جۇكتەيدى، – دەپ اتاپ ءوتتى وبلىس اكىمى. بۇدان سوڭ ءوڭىر باسشىسى ءسوزىن ءارى ساباقتاپ: – بۇگىنگى كۇنى وسكەلەڭ ۇرپاقتىڭ تەرەڭ ءبىلىم مەن ءتالىمدى تاربيە الۋىنا بۇكىل ەلدەگىدەي وڭىرىمىزدە قولايلى جاعداي جاسالىپ وتىر. سوعان سايكەس ارداقتى ۇستازداردان العان ساپالى ءبىلىم مەن سانالى تاربيە ارقاسىندا، ەل سەنىمىن اقتاپ، قاسيەتتى وتانىمىزدىڭ ناعىز پاتريوتتارى بولاتىندارىڭىزعا سەنەمىن. ادامزات بالاسى ءومىر بويى ءبىلىم الادى. ويتكەنى، ءبىلىم – تاۋسىلماس قازىنا، باعا جەتپەس بايلىق. سىزدەردەن جاڭالىققا جانى قۇمار، الەم وركەنيەتىنە جاقىن، وزىق ويلى جاستار رەتىندە ۇلكەن ءۇمىت كۇتەمىز. ساپارلارىڭىز ءساتتى بولسىن! – دەي كەلە، ا. باتالوۆ تۇلەكتەردى ماراپاتتاۋ راسىمىنە كوشتى. ۇزدىكتەردىڭ كەۋدەسىنە «التىن بەلگى» تاعىپ، پلانشەتتەر سىيعا تارتتى.
سالتاناتتى شارادا وبلىستىڭ ۇزدىك وقۋشىلارىنىڭ اتىنان تالدىقورعان قالاسىنداعى ءۇش تىلدە وقىتاتىن دارىندى بالالارعا ارنالعان №20 مەكتەپ ليسەيىنىڭ تۇلەگى اسىلجان بالاتۇرسىنوۆ پەن ىلە اۋدانىنداعى م. ماقاتايەۆ اتىنداعى № 13 مەكتەپتىڭ تۇلەگى ارۋجان تولەبەكوۆا سويلەدى. كورسەتىلگەن قولداۋلارعا العىستارىن ايتا وتىرىپ، وزدەرىنە ارتىلىپ وتىرعان سەنىمنىڭ ۇدەسىنەن شىعاتىندارىنا سەنىدىرگەن تۇلەكتەر ەلدىڭ يگلىگى ءۇشىن ءبىلىم الىپ، ەڭبەك ەتۋگە ءسوز بەردى.
بىتىرۋشىلەر ءۇشىن ەسترادا انشىلەرى ونەر كورسەتىپ، «ءبىلىم شارلارى» ۇشىرىلدى. ادەمى كەش كونسەرتتىك باعدارلامامەن قورىتىندىلاندى.
جالپى الماتى وبلىسىندا 14 268 تۇلەك مەكتەپ ءبىتىرىپ، سونىڭ 590-ى «التىن بەلگى» توسبەلگىسىنە، 528 تۇلەك ۇزدىك اتتەستاتقا يە بولدى.
الماتى وبلىسى اكىمىنىڭ باسپا ءسوز قىزمەتى
