Almaty oblysynda tergeýshiler 4 597 jalǵan stomatologiialyq qyzmet kórsetý deregin anyqtady. Tergeý málimetinshe, ortodontiialyq kómek kórsetildi dep tirkelgen kóptegen qyzmet shyn máninde patsientterge jasalmaǵan, tek qujat júzinde rásimdelgen, dep habarlaidy Dalanews.kz.
Belgili bolǵandai, jekemenshik stomatologiialyq klinikalar jelisiniń direktory Áleýmettik meditsinalyq saqtandyrý qorymen tegin meditsinalyq kómektiń kepildendirilgen kólemi aiasynda qyzmet kórsetý týraly kelisimsharttar jasasqan. Kelisimsharttardyń jalpy quny 450 million teńgeden asady.
Alaida tólem alý maqsatynda meditsinalyq "Damýmed" júiesine shyndyqqa janaspaityn derekter engizilip otyrǵan. Onda naýqastarǵa em júrgizildi degen jalǵan málimetter tirkelgen. Bul úshin dárigerlerdiń eseptik jazbalary, sondai-aq buryn klinikaǵa júgingen kámeletke tolmaǵan patsientterdiń jeke derekteri paidalanylǵan.
Tergeý derekterine sáikes, memleketke keltirilgen jalpy shyǵyn 66 million teńgeni quraidy. Sot sheshimimen kúdiktiniń 23 million teńge kólemindegi bank shottaryna jáne 29 million teńge turatyn stomatologiialyq jabdyqtarǵa tyiym salyndy.
Tergeý barysynda kúdikti 11 million teńgeni qaitaryp bergen. Qazirgi ýaqytta ol úiqamaqta otyr.
