Politsiia qyzmetkerlerin kásibi merekelerimen quttyqtaǵan oblys ákiminiń birinshi orynbasary Lazzat Turlashov oblysta memlekettik qoldaý nátijesinde salanyń materialdyq-tehnikalyq bazasyn nyǵaitýǵa basa nazar aýdarylatynyn atap ótti. Bul sharalar halyqtyń ál-aýqatyn arttyrý baǵytyndaǵy jumystyń nátijeli bolýyna óz yqpalyn tigizip keledi.
– Sizderdi Qazaqstan politsiiasynyń 25 jyldyq mereitoiymen shyn júrekten quttyqtaimyn! Osy shirek ǵasyrdaǵy qalyptasý kezinde elimizdiń ishki ister organdary túrli satylardan ótip, damýdyń jańa kezeńine kóterildi. Politsiia qyzmeti qaýipti de qiyn jumys bolsa da, búginde sizder bul jaýapkershilikti memleket pen azamattar aldynda laiyqty deńgeide atqaryp kelesizder. Sizderge osy eren eńbekterińiz úshin rizashylyǵymdy bildiremin. Elimizdiń órkendeýi jolyndaǵy, el tynyshtyǵyn saqtaýdaǵy isterińiz ilgerilei bersin! – degen L.Turlashov budan ári ishki ister organdarynyń úzdik qyzmetkerlerine qurmet gramotalary men alǵys hattar tapsyrdy.
Osy shara barysynda quqyq qorǵaý organdary qyzmetkerlerine 50 qyzmettik jańa avtokólik berildi.
Munan soń Almaty oblystyq IID bastyǵy, general-maior Murat Urumhanov áriptesterin quttyqtap, politsiianyń jas inspektorlaryna, qyzmetkerleri men ardagerlerine marapattar tapsyrdy.
Mereke saltanatty marshpen jáne kontserttik baǵdarlamamen jalǵasty.
Jalpy, Almaty oblysyndaǵy ishki ister organdarynda 5 myńnan astam politseiler eńbek etedi. «Qaýipsiz aýla» jobasynyń sheńberinde Taldyqorǵan qalasynda quny 4,5 mlrd. teńge bolatyn 800 kamera ornatylýda. Oǵan qosa biylǵy jyly 62 ýchaskelik politsiia pýnktin salý josparlanyp otyr. Bul pýnktte politsiia qyzmetkeriniń turǵyn úii de birge qarastyrylatyn bolady. Jobanyń quny 1 mlrd. teńge.
