Almaty oblysynyń ákimi Marat Sultanǵazıev ekijaqty baılanystardy nyǵaıtý jáne ózara tıimdi yntymaqtastyqtyń jańa múmkindikterin izdeý maqsatynda Qytaıdyń Henan provınsıasynda boldy, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.
Sapar barysynda oblys ákimi Henan provınsıasynyń gýbernatory Van Kaımen kezdesip, ártúrli salalarda, eń aldymen aýyl sharýashylyǵynda birlesken jumystardyń keleshegi talqylady,
Gýbernator Van Kaı Henan úshin aýyl sharýashylyǵynyń mańyzdylyǵyna toqtalyp, provınsıanyń Qytaıdaǵy eń iri astyq ortalyǵy ekenin atap ótti. Ol sondaı-aq damyǵan ınfraqurylymnyń, júgeri men bıdaı óndirisiniń joǵary deńgeıine, tamyr, maı jáne qus sharýashylyǵynyń damyp kele jatqanyna toqtaldy.
Van Kaı yntymaqtastyqtyń úsh negizgi baǵytyn atap ótti – aýyl sharýashylyǵy, saýda-ónerkásiptik áriptestik jáne gýmanıtarlyq baılanystar. Kezdesýde Van Kaı myrza tranzıttik tasymaldaý salasynda birlesken jumystyń áleýetin aıta kele, akademıalyq tájirbıe almasýdy damytýǵa qyzyǵýshylyq tanytty.
Óz kezeginde Almaty oblysynyń ákimi Marat Sultanǵazıev Qytaımen ózara tıimdi yntymaqtastyqtyń mańyzdylyǵyna toqtalyp, elimizdegi aldyńǵy qatarly óńirleriniń biri sanalatyn Almaty oblysynda agroónerkásip kesheni, týrızm men ónerkásip damyǵanyn aıtty. Oblys basshysy aımaqtyń QHR jáne Qyrǵyzstanmen shektesetin strategıalyq ornalasýyna jáne damyǵan kólik ınfraqurylymynyń baryna toqtaldy.
Marat Sultanǵazıev yntymaqtastyqtyń negizgi baǵyttaryn atap ótti:
- Aýyl sharýashylyǵy: sýdy únemdeıtin tehnologıalardy qoldaný, astyq óndirý, qus sharýashylyǵy jáne sút sharýashylyǵy boıynsha tájirıbe almasý.
- Qurylys: Qonaev jáne Alataý qalalaryn damytýǵa Qytaı ınvestısıasyn tartý.
- Logıstıka: birlesken ındýstrıalyq parkter qurý jáne logıstıkalyq ortalyqtardy damytý.
- Bilim: Almaty oblysynda birlesken ýnıversıtetter qurý.
Kezdesý Almaty oblysy men Henan provınsıasynyń ózara tıimdi yntymaqtastyǵy ekijaqty qarym-qatynastardy damytýǵa septigin tıgizetinine jáne eki tarapqa da naqty paıda ákeletinine senim bildirýmen aıaqtaldy.
