"Nátıjeli jumyspen qamtý jáne jappaı kásipkerlikti damytý" baǵdarlamasy sheńberinde Almaty oblysynda bıylǵy jańa oqý jylynda kolejderge 1535 bilim alýshy qabyldanatyn bolady. Oqýǵa qabyldanýǵa úmitkerler tizimin jergilikti jerlerde arnaıy qurylǵan mobıldik toptar anyqtaýda. Búgingi kúnge jumysshy mamandyqtardy daıyndaý boıynsha 43 mamandyqtyń tizbesi ázirlenip, kolejder tizimi bekitilgen.

Oblystyq bilim basqarmasynyń málimetine súıensek, óńirdegi tehnıkalyq jáne kásiptik bilim berý kolejderine bıylǵy jańa oqý jylynda jalpy memlekettik bilim berý tapsyrysy negizinde oblystyq búdjet esebinen 5600-den astam adam qabyldaý josparlanyp otyr. Sonyń 4500-ge jýyǵy jumysshy mamandyqtar boıynsha oqytylatyn bolady. Kolejderde tehnıkalyq jáne tehnologıalyq, aýyl sharýashylyǵy, qurylys, qyzmet kórsetý salalary boıynsha jáne basqa da baǵytta mamandar daıarlanbaq.

Sonymen qatar birqatar kolejderde jańa mamandyqtar ashyldy. Máselen, olardyń qatarynda «Gaz qubyrlaryn paıdalaný jáne jóndeý slesary», «Slesar – vagondardy quraýshy», «Ashytý prosesiniń operatory», «Syzýshy», «Kókónis tuzdaýshy», «Qaımaǵy alynbaǵan jáne ashymaly sút ónimderin jasaý sheberi» jáne basqa da búgingi eńbek naryǵynda suranysqa ıe birqatar mamandyqtar bar. Bul maqsatqa oblystyq búdjetten 90,2 mln. teńge bólinip otyr.