Almatylyqtar metro aqysyn tikelei týrnikette bank kartasymen tólei alady, dep habarlaidy Dalanews.kz.
Keler jyldan bastap Almaty metrosyndaǵy barlyq týrniketter jańartylyp, bailanyssyz tólem júiesimen jabdyqtalady.
Jolaýshylar endi bank kartasy nemese Apple Pay, Google Pay, Samsung Pay siiaqty servister arqyly tikelei týrnikette tólem jasai alady.
Bul jańashyldyq kirý kezindegi uzyn-sonar kezekterdi azaitýǵa baǵyttalǵan. Qazirgi ONAY júiesi keide tólemdi 7 sekýndqa deiin óńdeidi, bul óz kezeginde týrniket mańynda keptelis týdyrady.
Sonymen qatar, keshki ýaqyttarda poiyzdardyń júrý aralyǵy qysqarmaq. Qala biliginiń málimetinshe, metropoliten quramyna qosymsha 10 jańa poiyz engiziledi.
