Almaty oblystyq balalar úiinen (Baǵanashyl) balalardy kóshirý barysynda óreskel jaǵdai tirkeldi. Bul týraly Bala quqyqtary jónindegi ýákil Dinara Zákieva málimdedi, dep habarlaidy Dalanews.kz.
Zákievanyń aitýynsha, prezidenttiń tapsyrmasyna sáikes, Almaty oblystyq balalar úiinde turaqty turatyn balalar oqýyn jalǵastyrý úshin Almaty qalasynda qalatyn boldy. Al mekemeniń ózi qala qaramaǵyna beriledi.
«Búgin balalar úiiniń turaqty tárbielenýshileri emes, TsAN-da ýaqytsha turyp jatqan balalar kóshirildi», – dep jazdy ombýdsmen.
Onyń aitýynsha, bul balalar – ómirlik qiyn jaǵdaiǵa tap bolǵan, oblystyń ár óńirinen kelgen jetkinshekter. Olar kóktemde balalar men ákimdik arasyndaǵy kezdesýde qabyldanǵan sheshimge sáikes, mekememen birge kóshýi tiis bolǵan. Bul aqparatty ýákil sol kezde-aq jariialaǵan.
«Keshe bul týraly ákimdik Almaty oblystyq bilim basqarmasynyń resmi paraqshasynda habarlady», – dedi ol.
Alaida kóshirý barysy tiisti deńgeide uiymdastyrylmaǵan.
«Almaty oblysynyń ákimdigi TsAN-da turatyn balalardyń kóshýi kezinde qaýipsizdikti qamtamasyz etpedi. Sonyń saldarynan jol berilmeitin jaǵdai oryn aldy: balalar úiiniń túlegi qyz esinen tanyp qaldy, bir balanyń aiaǵy jaraqattandy», – dep jazdy Zákieva.
Ol balalardan habarlama alǵan soń, sońǵy aptada birneshe ret ákimdikke júgingenin aitty.
«Alaida jergilikti atqarýshy organ eskertý jasamai, óz betinshe áreket etti», – dedi ýákil.
Qazirgi tańda Prezident Ákimshiligi bul jaǵdai boiynsha tekserý júrgizip jatyr. Arnaiy top qurylǵan.
«Óńirlik ýákil balalarmen birge. Men de balalarǵa bara jatyrmyn», – dep habarlady Dinara Zákieva.
Eske salaiyq, buǵan deiin prezident Qasym-Jomart Toqaev Almatyda jetim balalardy Qonaevqa kúshtep kóshirýdi toqtatýdy tapsyrǵan bolatyn.
