Almaty mańynda Qamshy Kólbaevtyń uiymdasqan qylmystyq tobynyń (UQT) múshesi Asanbek (Qamshy) Kólbaev ustaldy, dep habarlaidy Dalanews.kz.
"QR IIM Kriminaldyq politsiia departamenti Almaty mańynda qyrǵyzstandyq azamatty ustady. Ol memleketaralyq izdeýde júrgen. 2008 jyly qylmystyq toptar arasyndaǵy qaqtyǵys kezinde kisi óltirdi degen kúdikke ilingen. Qyrǵyz Respýblikasynyń IIM málimetinshe, ustalǵan azamat Qamshyek Kólbaevtyń UQT-synyń belsendi múshesi bolǵan", – delingen senbi kúngi habarlamada.
Ministrlik naqtylaǵandai, qyrkúiek aiynyń basynan beri izdeýde júrgen 81 adam ustalyp, 58 habar-osharsyz ketken adamnyń qaida ekeni anyqtalǵan.
"Astanada jalpy somasy 160 mln teńgeden asatyn birqatar alaiaqtyq áreket jasaǵan kúdikti ustaldy. Sondai-aq TMD elderi men shetelderden 28 qylmysker qolǵa tústi. Máselen, elorda áýejaiynda Moldova IIM-i 2013 jyldan beri 150 myń dollar bopsalaý jáne adam urlaý deregi boiynsha izdestirgen Resei azamaty ustaldy", – dedi vedomstvo.
Aita keteiik, Qamshybek Kólbaev (Qamshybek Asanbek) – Qyrǵyzstandaǵy eń yqpaldy qylmys áleminiń serkesi bolǵan. Ol reket, bopsalaý jáne qylmystyq jolmen kelgen tabysty zańdastyrýmen ainalysqan transulttyq qylmystyq uiym qurdy degen kúdikke ilingen. Onyń qylmystyq áreketi Qyrǵyzstan aýmaǵymen ǵana shektelmei, Qazaqstandy da qamtyǵan.
2020 jyly ol qylmystyq qaýymdastyq qurdy degen aiyppen ustalyp, iri kólemde kepil tólegen soń qolhatpen bosatylǵan. 2023 jyly tamyzda oǵan qatysty qylmystyq is qylmystardyń 2007–2009 jyldary jasalǵanyna bailanysty eskirý merzimi ótip ketkendikten toqtatyldy. Al 2023 jylǵy 4 qazanda Bishkekte arnaiy operatsiia barysynda Kólbaevty ustaý kezinde ol kóz jumdy. Onyń óliminen keiin memleket oǵan jáne otbasyna tiesili júzdegen páterdi, avtokólikterdi jáne biznestegi úlesterdi tárkilei bastady.
