Almatyda zamanaýı jabdyqtar men tehnologıalardy paıdalana otyryp, kóshe jaryqtandyrýyn basqarý júıesi jumys isteıdi. Jańǵyrtýdyń basty maqsaty kósheni jaryqtandyrý jumysyn jaqsartý jáne oǵan qyzmet kórsetý shyǵyndaryn qysqartý bolyp tabylady.
Memlekettik-jekeshelik áriptestik sharty aıasynda 2019-2020 jyldar aralyǵynda qalanyń 14 magıstraldy kóshesi boıynsha 11 161 sham aýystyryldy, bul qalalyq shamdardyń jalpy sanynyń 8%-in quraıdy. Muhıt Ázirbaev bul shamdardy aýystyrý jyl saıyn elektr energıasynyń 20%-in únemdeıtinin atap ótti.
Aǵymdaǵy jyly 27 kósheni jańǵyrtý josparlanǵan, onyń aıasynda 5 myńǵa jýyq sham men 2 myń tirek aýystyrylatyn bolady. Osy baǵyttaǵy jumystardyń 90% aıaqtaldy.
2023 jyldyń sońyna deıin taǵy 33 145 LED sham ornatý josparlanǵan.
Ákimniń orynbasarynyń aıtýynsha, kóshe jaryǵynyń jaǵdaıyn qashyqtyqtan basqarý men baqylaýdyń keń múmkindikteri, jabdyqtyń saqtalýyn qamtamasyz etý jáne tutynylatyn energıany naqty esepke alý atalǵan jańǵyrtýdyń artyqshylyǵy bolyp tabylady.
Zamanaýı tehnologıalardy qoldaný elektr taratý jelilerindegi apattylyq deńgeıin aıtarlyqtaı tómendetedi, shtattan tys jaǵdaılardy joıý kezinde, sondaı-aq josparly profılaktıkalyq jáne jóndeý jumystaryn júrgizý kezinde ýaqytty únemdeıdi. Búgingi tańda jańa kóshe shamdarynyń jumysyndaǵy aqaýlardy joıý 2-3 saǵattan aspaıdy.
Sondaı-aq, elektr taratýdyń áýe jelilerin jerasty kábildik oryndaýǵa kóshirý arqasynda múmkin bolǵan «taza aspan» tujyrymdamasynyń iske asyrylýyn atap ótken jón.
Almaty kóshelerin jaryqtandyrýdy basqarýdyń jańa júıesin engizý qaladaǵy qozǵalys qaýipsizdigi deńgeıine jaǵymdy áser etedi, megapolıs turǵyndary men qonaqtary úshin qolaıly jaǵdaıdy qamtamasyz etedi.
Almaty ákiminiń tapsyrmasy boıynsha «Shetsiz qala» baǵdarlamasy da iske asyrylýda. Ótken jyly 1 423 kóshe jaryqtandyrylyp, energıa únemdeıtin shamdar qoldanyldy.
2021 jyldyń 11 aıynda Almaly, Áýezov, Bostandyq, Medeý aýdandaryndaǵy 601 kóshege sham ornatý josparlanǵan. Búginde atalǵan jumystar 540 kóshede (90%) oryndaldy.
Muhıt Ázirbaevtyń aıtýynsha, kelesi jyly qalǵan 1 066 ishinara jaryqtandyrylmaǵan kósheni jaryqtandyrý jumystaryn jalǵastyrý josparlanýda.
Almaty aýlalary da qalabıliginiń nazarnan tys qalmaıdy. Máselen, qalanyń aýla aýmaqtaryn jaryqpen qamtamasyz etý boıynsha joba ázirlendi. Qazirgi ýaqytta qalanyń 486 aýla aýmaǵynda qurylys jumystaryn júrgizý úshin merdiger uıymdy anyqtaý boıynsha konkýrstyq rásimder júrgizilýde.
