Almaty áýejaiynyń eki qyzmetkeri jolaýshy zattaryn urlaǵan
28 qańtar kúni Almaty áýejaiyndaǵy ishki ister jelilik bólimine qala turǵyny habarlasyp, 25 jeltoqsanda «Aqtóbe – Almaty – Kiev» baǵytyndaǵy áýe reisimen ushý kezinde óziniń qol júginen sý jańa uialy telefon men zergerlik buiymdar – syrǵalardyń urlanǵanyn aitqan.
Jábirlenýshi jeke zattarynyń qoldy bolǵanyn Kiev áýejaiyna qonǵanda bir-aq bilgen.
Kólik politseileri osy derek boiynsha jedel-izdestirý sharalary barysynda «Almaty halyqaralyq áýejaiy» AQ-da qabyldap-tapsyrýshy qyzmetinde jumys isteitin eki jas jigitti anyqtap, ustady. Olar jumys ornynda aldyn ala ózara kelise otyryp, urlyq jasaǵan.
Urlanǵan zattar tárkilenip alyndy.
Kúdiktiler Almaty qalasy IID ýaqytsha ustaý izoliatoryna qamaldy.
Olarǵa qatysty QR QK 188-baby 2-bólimi 1-tarmaǵy (Urlyq) boiynsha sotqa deiingi tergeý amaldary júrgizilýde.
Qazirgi ýaqytta ustalǵandardyń buryn jasalǵan osyǵan uqsas qylmystarǵa qatysy bar-joǵy anyqtalyp jatyr, dep habarlady Kóliktegi IID baspasóz qyzmeti.
