Almaty ákimdigi jalǵan aqparat taratqan adamdy politsiiaǵa tapsyratynyn málimdedi, - dep habarlaidy Dalanews.kz.
Áńgime Erbolat Dosaevtyń kómekshisi týraly jalǵan aqparat taratqandar týraly bolmaq. Sebebi jelide Almaty ákimi kómekshisiniń ustalǵany týraly jalǵan aqparat taralyp jatyr, bul habarlamaǵa Almaty oblysy Ile aýdany ákiminiń fotosy kórsetilgen.
"Osyǵan bailanysty Almaty qalasynyń ákimdigi jalǵan aqparat taratqandardy anyqtaý úshin quqyq qorǵaý organdaryna júginetinin málimdeidi. Eske salaiyq, zańnamaǵa sáikes, jalǵan aqparat taratqandar ákimshilik jáne qylmystyq jaýapkershilikke tartylýy múmkin", - delingen ákimdiktiń habarlamasynda.
Aita keteiik, 4 qyrkúiekte Almaty oblysynda Ile aýdanynyń ákimi Baǵdat Qarasaev ustalǵan bolatyn. Almaty oblysynyń Prokýratýrasynyń málimetinshe, Ile aýdanyndaǵy qoqys poligonynyń qyzmetin birlesip tekserý nátijesinde ákim sybailas jemqorlyqqa qatysy bar degen aiyppen qamaýǵa alyndy.
"Almaty oblysynyń prokýratýrasy men Sybailas jemqorlyqqa qarsy qyzmeti Ile aýdanynda ornalasqan qoqys poligonyn tekserý jumystaryn aiaqtady. Jedel-izdestirý is-sharalarynyń nátijesinde 2024 jylǵy 3 qyrkúiekte Qarasaev Qylmystyq-protsestik kodeksiniń 128-131-baptaryna sáikes sybailas jemqorlyq áreketteri boiynsha kúdikpen ustaldy. Oǵan kásipkerlik qyzmetke zańsyz aralasý, laýazymdyq ókilettikterin asyra paidalaný jáne olardy teris paidalaný aiyptary taǵylyp otyr, bul memlekettiń múddelerine ziian keltirgen", - dep habarlady Almaty oblysynyń prokýratýrasy.
4 qyrkúiekte prokýratýra prokýratýra bultartpaý sharasyn qaraý jáne sanktsiialaý úshin qylmystyq is materialdaryn sotqa jiberdi.
