Almatyda aýany jaqsartý jáne kólik infraqurylymyn damytý baǵytynda keshendi sharalar qolǵa alyndy. Bul týraly qala ákiminiń orynbasary Almashan Smatlaev Óńirlik kommýnikatsiialar qyzmetinde ótken baspasóz konferentsiiasynda málimdedi, dep habarlaidy Dalanews.kz.
Alǵash ret almatylyq aglomeratsiiada lastaýshy zattardyń ruqsat etilgen deńgeiine zertteý júrgizildi. Oǵan qala aýmaǵymen birge 10 shaqyrymdyq radiýstaǵy kólik, jeke úiler men monshalar da engizildi. Nátijesinde jylyna 225 myń tonnadan asa shyǵaryndy tirkelgen, onyń 189 myńy Almatyǵa tiesili. Lastanýdyń 60%-ǵa jýyǵy kólikten keledi.
"Qalada kún saiyn 1,1 mln-nan asa kólik júredi. 2030 jylǵa qarai Almaty halqy 2,5 mln adamǵa jetip, ár myń turǵynǵa 311 kólikten kelmek. Bul jaǵdai qoǵamdyq kólikti – metro, LRT, BRT, aspaly joldar jáne ózge baǵyttardy jedel damytý qajettigin kórsetedi", – dedi Almashan Smatlaev.
2025 jyldan bastap kólik shyǵaryndylaryna qatysty zańnama kúsheitildi: endi shekten tys lastaýǵa eskertý jasalmaidy, birden aiyppul salynady.
Qaitalanǵan jaǵdaida jeke tulǵalarǵa – 10 AEK, zańdy tulǵalarǵa – 100 AEK, al óreskel zańbuzýshylyq úshin tiisinshe 20 jáne 200 AEK aiyppul qarastyrylǵan.
Almaty ákimdigi málimetinshe, qazir atmosferalyq aýany qorǵaý erejeleriniń jobasy daiyndalyp jatyr. Qujat tiisti organdarmen kelisilgen soń jyl sońyna deiin Máslihattyń qaraýyna usynylady.
Ol qaladaǵy ekologiialyq qaýipsizdikti arttyrýǵa, turǵyndarǵa taza ári qolaily orta qalyptastyrýǵa jáne aýanyń lastanýyn azaitýǵa baǵyttalǵan.
