Saltanatty is-sharaǵa QR Ishki ister ministriniń orynbasary politsiia general-maiory Erjan Sadenov, Akademiia Ardagerler keńesiniń tóraǵasy general-maior Talap Qabdenov, "Generaldar keńesi" RQQ tóraǵasynyń birinshi orynbasary general-leitenant Beksultan Sarsekov, general-maior Moldiiar Orazaliev, general-maior Maratqali Núkenov, general-maior Jan Kenjetaev, otstavkadaǵy politsiia polkovnigi Dáýlet Qusaiynov, QR IIM Qoǵamdyq keńesiniń tóraǵasy Rahym Oshaqbaev jáne Akademiiany bitirýshilerdiń ata-analary men qyzmet babynda qaza tapqan qyzmetkerlerdiń týystary qatysty.
Saltanatty is-sharanyń kelesi kezeńinde M.Esbolatov atyndaǵy Almaty akademiiasyn bitirýshi túlekterge diplomdy Ishki ister ministriniń orynbasary politsiia general-maiory Erjan Sadenov pen Almaty akademiiasynyń bastyǵy politsiia polkovnigi Aidar Saitbekov tabystady.
Almaty akademiiasyn biyl 276 kýrsant bitirip shyǵady, onyń ishinde 13 kýrsant qyzyl diplom iegeri.
234 kýrsant – jedel izdestirý bilim berý baǵdarlamasyn, 42 kýrsant – aqparatttyq júieler men radiotehnika, elektronika jáne telekommýnikatsiia boiynsha bilim berý baǵdarlamasyn aiaqtady.
Erekshe aita ketetin jait – búgingi tańdaǵy suranysqa ie zamanaýi mamandar daiarlaityn Almaty akademiiasy biyl alǵash ret IT mamandar daiarlap shyǵardy. Kiber qylmystardy ashýǵa mamandanǵan IT mamandardyń ekeýi QR IIM Ortalyq apparatynda qyzmet atqarýǵa joldama aldy.
Bitirýshi túlekterdi saltanatty túrde quttyqtaǵan Erjan Sadenov, Talap Qabdenov jáne Rahym Oshaqbaev olarǵa el tynyshtyǵyn kúzetýde abyroily eńbek etý úshin sát-sapar tiledi. Akademiia túlekteri atynan sóz alǵan politsiia leitenanty Nurdaýlet Toilybai ishki ister organdarynda qyzmet atqarý barysynda Otan aldyndaǵy antqa adal bolyp, Jańa Qazaqstannyń jarqyn bolashaǵy úshin aianbai eńbek etetinderine senim bildirdi.
Saltanatty jiyn kezinde kýrsanttar men qonaqtar qaza tapqan túlekterdiń eskertkishine gúl shoqtaryn qoiyp, avtomattan oq atyp qurmet kórsetti jáne bir minýt únsizdik jariialap qoǵam tynyshtyǵy úshin qurban bolǵan áriptesterin eske túsirdi.
