Jýyrda áleýmettik jeliler men messendjerlerde "Ulttyq qaýipsizdik komiteti ardagerleriniń ashyq úndeýi" dep atalatyn mátin tarap, qoǵam nazaryn aýdarǵan edi. Osy oraida Respýblikalyq "Qazaqstan Respýblikasy Ulttyq qaýipsizdik komiteti organdarynyń ardagerleri" qoǵamdyq birlestigi resmi málimdeme jasap, atalǵan úndeýdiń ózderine esh qatysy joǵyn málimdedi, dep habarlaidy Dalanews.kz.
Uiym ókilderiniń aitýynsha, áleýmettik jelilerde jariialanǵan material UQK ardagerleriniń resmi ustanymyn bildirmeidi jáne bul aqparat jalǵan ári arandatýshylyq sipatqa ie.
"Áleýmettik jeliler men messendjerler arqyly tarap jatqan bul úndeý bizdiń birlestiktiń resmi málimdemesi emes. Onyń mazmuny uiymnyń resmi ustanymyna múldem sáikes kelmeidi jáne shyndyqqa janaspaidy", – dep atap ótti birlestik basqarmasy.
Sondai-aq, uiym taraǵan aqparattyń qoǵamdyq-saiasi ahýaldy turaqsyzdandyrýǵa, memlekettik organdarǵa senimsizdik týdyrýǵa jáne ulttyq qaýipsizdik júiesin bedelinen aiyrýǵa baǵyttalǵan aqparattyq arandatý áreketi bolýy yqtimal ekenin eskertti.
"Biz azamattardy aqparat taratý jáne tutyný barysynda qyraǵylyq pen jaýapkershilik tanytýǵa shaqyramyz. Tek tekserilgen, resmi derekkózderge ǵana senip, memlekettik institýttar men qoǵamǵa qurmetpen qaraýymyz qajet", – delingen málimdemede.
Sonymen qatar, UQK ardagerleri qoǵamdyq birlestigi óz qyzmetin memlekettik saiasatty qoldaý, kásibi dástúrlerdi saqtaý jáne elimizdiń ulttyq qaýipsizdigin nyǵaitý baǵytynda júzege asyratynyn erekshe atap ótti.
"Tek syndarly dialog, memleketke degen qurmet jáne zańdylyq qaǵidalaryn saqtaý ǵana elimizdiń turaqty damýy men qaýipsizdigin qamtamasyz ete alady", – dep qorytyndylady Respýblikalyq qoǵamdyq birlestiginiń basqarmasy.
Málimdeme 2025 jylǵy 3 mamyrda jariialandy.
