Qazaqstanda áleýmettik qoldaýdyń jańa modeli engizilýde. Bul júie boiynsha jergilikti biýdjet esebinen kórsetiletin qosymsha qoldaý sharalary tek turmystyq jaǵdaiyna qarai bes sanatqa bólingen otbasylarǵa avtomatty túrde taǵaiyndalady, dep habarlaidy Dalanews.kz.
Eńbek jáne halyqty áleýmettik qorǵaý ministrliginiń málimetinshe, pilottyq joba Shymkent qalasy men Qaraǵandy oblysynda iske asyrylýda. Ol 21 mamyrda alty ministrlik qol qoiǵan birlesken buiryq negizinde júzege asyrylyp jatyr. Jańa tásil respýblikalyq biýdjetten tólenetin barlyq áleýmettik tólemdi saqtai otyryp, jergilikti atqarýshy organdar qarjysy esebinen qosymsha qoldaýdy nysanaly túrde bólýge múmkindik beredi.
“Árbir otbasynyń ál-aýqat deńgeii 23 áleýmettik-demografiialyq jáne ekonomikalyq kórsetkish boiynsha aiqyndalady. Qosymsha qoldaý alýǵa ótinish bildirgen otbasylar alty sanatqa jikteledi: eń tómengi deńgeige azyq-túliktiń jetpeýinen bastap, eń joǵarǵy deńgei eshqandai materialdyq qiyndyq kórmeitin otbasylarǵa deiin. Sheshim otbasylardyń tsifrlyq kartasy arqyly jinalǵan obektivti derekter negizinde avtomatty túrde qabyldanady”, – delingen habarlamada.
Kómek qajettilik deńgeiine qarai taǵaiyndalady. Bul rette otbasynyń tabysy, múlki, kóligi, nesieleri, densaýlyǵy, múgedektigi, bilimi, asyraýyndaǵy júktemesi jáne jasyryn tabystary eskeriledi. Eger otbasynyń eki nemese odan da kóp jyljymaityn múlki, kóligi, tirkelgen kásibi bolyp, bir adamǵa shaqqandaǵy tabysy tórt eń tómengi kúnkóris deńgeiinen (222 244 teńge) asyp ketse, olar altynshy sanatqa engiziledi de, jergilikti biýdjet esebinen qosymsha qoldaý alýshylar tiziminen shyǵarylady. Al qalǵan bes sanattaǵy otbasylarǵa kómek avtomatty túrde taǵaiyndalady.
