AQSH-ta ótken halyqaralyq NeoScience Olympiad jáne Coding Olympiad Grand Final baıqaýlarynda qazaqstandyq oqýshy Láılim Erlanqyzy aıryqsha nátıje kórsetti, dep habarlaıdy Dalanews.kz.

Ol eki altyn, eki kúmis jáne bir qola medal ıelenip, jeke esepte joǵary kórsetkishke qol jetkizdi. Komandalyq nátıje boıynsha Qazaqstan quramasy álemdik reıtıńte úshinshi orynǵa shyqty.

Láılim Erlanqyzy – jýrnalıs anasynyń tárbıesin kórgen, dástúrli ánshi Erlan Rysqalıdiń qyzy, ári búgingi tańda ǵylym men tehnologıa salasynda qatarlastarynan oq boıy ozyp kele jatqan jas daryn.

Halyqaralyq dodada Láılimniń tabandylyǵy men bilimge degen qushtarlyǵy anyq baıqaldy. Kúrdeli tapsyrmalar men joǵary básekege qaramastan, ol óz múmkindigin tolyq kórsete aldy. Bul nátıje tek jeke jetistik emes, qazaqstandyq bilim júıesiniń áleýetin de aıqyndaıdy.

Jas darynnyń jeńisi áleýmettik jelilerde keńinen qoldaý taýyp, kópshilik tarapynan jyly lebizder aıtyldy. Ustazdary men jaqyndary onyń bul jetistigin úlken eńbektiń, úzdiksiz daıyndyq pen senimniń jemisi dep baǵalap otyr.

Mundaı tabystar Qazaqstannyń jas býyny álemdik arenada básekege qabiletti ekenin dáleldeıdi. Láılimniń jeńisi kóptegen oqýshylarǵa shabyt berip, ǵylym men tehnologıaǵa bet burýǵa jol ashady.