Májilis dálizinde jýrnalıser syrtqy ister mınıstriniń orynbasary Álibek Baqaevtan Qatar astanasynda zardap shekkender arasynda qazaqstandyqtardyń bar-joǵy jóninde surady, dep habarlaıdy Dalanews.kz.
SİM pikiri
"Zardap shekkender joq. Bizge habar túsken joq. Qazirgi tańda Qatarda shamamen 1500 otandasymyz júr", – dedi Álibek Baqaev.
Onyń aıtýynsha, olardyń 516-sy konsýldyq esepke alynǵan jáne dıplomattar olarmen turaqty baılanysta.
Oqıǵanyń anyq-qanyǵy
9 qyrkúıekte Izraıl Dohaǵa soqqy jasady. Shabýyl nysanasyna AQSH-tyń Gazadaǵy soǵysty toqtatý jónindegi usynysyn talqylaý úshin kelgen HAMAS delegasıasy ornalasqan turǵyn úıler ilikken. Bul qadamdy Qatar qatań aıyptady.
Qazaqstannyń reaksıasy
Prezıdent Qasym-Jomart Toqaev ta Qatar astanasy Dohada Izraıl bıligi jasaǵan áskerı aksıany aıyptady.
"Qandaı maqsatty kózdese de, mundaı áreketke jol berýge bolmaıdy. Bul Qatar memleketiniń egemendik quqyǵyn buzady jáne halyqaralyq quqyq qaǵıdattaryna qaıshy keledi", - dedi Toqaev.
