Onyń aitýynsha, koronavirýs indetin lokdaýn, shekteý sharalaryn engizý arqyly jeńý múmkin emes. Bul sharalar tek COVID-19 infektsiiasynyń taralý kórsetkishin ýaqytsha tómendetedi.
"Pandemiiany vaktsinalaý arqyly ǵana jeńýge bolady. Ujymdyq immýnitetti qalyptastyrý árqaisymyzǵa tikelei bailanysty. Sebebi ujymdyq immýnitet qalyptasqanda ǵana oqýshylar men stýdentter sabaǵyn offlain rejimde oqi alady, sol siiaqty kásiporyndardyń bári karantindik shekteýsiz jumys isteidi. Eń bastysy adam ólimi azaiady. Bul jai sandar emes, árqaisysynda bir adamnyń ómiri men olardyń otbasylarynyń taǵdyry tur!", - dep jazdy Kólginov Instagram paraqshasynda.
Ákimdik pandemiiamen kúreste qandai sharalar qabyldap jatyr
- Mobildi brigadalar sanyn arttyrý. Qalada koronavirýs infektsiiasyn juqtyrǵan naýqastardyń úiine baratyn 186 brigada bar. Olar naýqastardyń densaýlyǵyn tekserip, PTR alady, sondai-aq qarym-qatynasta bolǵan azamattardy tekseredi. Brigadalar sany taǵy 100 birlikke kóbeitiledi.
- Meditsina mekemelerin barynsha jabdyqtaý. Meditsina mekemelerin qajetti apparattarmen jabdyqtaý jumystary biyl jalǵasyn tabady. Máselen, qosymsha jyljymaly rentgen apparattary, patsient monitorlary, perfýzorlar jáne t.b. jetkizildi. Ótken jyldyń ózinde meditsina mekemeleri 1 myńnan astam flýometrmen, 330-dan astam ottegi kontsentratymen, 50-den astam jasandy tynys aldyrý apparatymen tolyqtai jabdyqtaldy. Sondai-aq, KT apparattary, tsifrly rentgenografiialyq júieler, ottegi rezervýarlary jáne t.b. ornatyldy.
- Dári-dármekpen qamtamasyz etý. Dári-dármekter men jeke qorǵanys quraldarynyń eki ailyq qory bolýǵa tiis.
- Vaktsinalaý qarqynyn arttyrý. Meditsina mekemeleriniń bárinde, sol siiaqty iri saýda oiyn-saýyq ortalyqtary men saýda úilerinde vaktsinalaý pýnkti ashyldy. Sonymen qatar, eńbek ujymdaryn vaktsinatsiialaý úshin kóshpeli brigadalar uiymdastyryldy. Qazir 318 myńnan astam adam vaktsina aldy.
Sondai-aq, sanitarlyq normalardy saqtaý boiynsha monitoringtik toptardyń jumysy kúsheitildi.
"Vaktsinalaý – bul jai ǵana tańdaý emes. Aldyńyzda eki tańdaý tur, vaktsinalaý arqyly tolyqqandy salaýatty ómirdi tańdaisyz nemese aýrýhana tósegine tańylyp, indetpen kúresýińizge týra keledi. Sebebi koronavirýs adam aǵzasyn álsiretip, densaýlyqqa qatty soqqy beredi. Mundai qaýipti shaqta densaýlyǵyńyzdy qaterge tikpeńiz. Vaktsinalaý ǵana ózińizdi, jaqyndaryńyzdy jáne ainalańyzdaǵy adamdardy qorǵaýǵa múmkindik beredi!", — dep úndeý jasady elorda ákimi.
Qazir Nur-Sultan "qyzyl" aimaqta tur. Koronavirýsty juqtyrý kórsetkishi boiynsha elorda kósh bastap keledi. Sońǵy táýlikte elde 5179 adamnan koronavirýs tabylsa, onyń 1277-i Nur-Sultanda tirkeldi.
