ونىڭ ايتۋىنشا، كوروناۆيرۋس ىندەتىن لوكداۋن، شەكتەۋ شارالارىن ەنگىزۋ ارقىلى جەڭۋ مۇمكىن ەمەس. بۇل شارالار تەك COVID-19 ينفەكسياسىنىڭ تارالۋ كورسەتكىشىن ۋاقىتشا تومەندەتەدى.
"پاندەميانى ۆاكسينالاۋ ارقىلى عانا جەڭۋگە بولادى. ۇجىمدىق يممۋنيتەتتى قالىپتاستىرۋ ءارقايسىمىزعا تىكەلەي بايلانىستى. سەبەبى ۇجىمدىق يممۋنيتەت قالىپتاسقاندا عانا وقۋشىلار مەن ستۋدەنتتەر ساباعىن وففلاين رەجيمدە وقي الادى، سول سياقتى كاسىپورىنداردىڭ ءبارى كارانتيندىك شەكتەۋسىز جۇمىس ىستەيدى. ەڭ باستىسى ادام ءولىمى ازايادى. بۇل جاي ساندار ەمەس، ءارقايسىسىندا ءبىر ادامنىڭ ءومىرى مەن ولاردىڭ وتباسىلارىنىڭ تاعدىرى تۇر!"، - دەپ جازدى كولگىنوۆ Instagram پاراقشاسىندا.
اكىمدىك پاندەميامەن كۇرەستە قانداي شارالار قابىلداپ جاتىر
- ءموبيلدى بريگادالار سانىن ارتتىرۋ. قالادا كوروناۆيرۋس ينفەكسياسىن جۇقتىرعان ناۋقاستاردىڭ ۇيىنە باراتىن 186 بريگادا بار. ولار ناۋقاستاردىڭ دەنساۋلىعىن تەكسەرىپ، پتر الادى، سونداي-اق قارىم-قاتىناستا بولعان ازاماتتاردى تەكسەرەدى. بريگادالار سانى تاعى 100 بىرلىككە كوبەيتىلەدى.
- مەديسينا مەكەمەلەرىن بارىنشا جابدىقتاۋ. مەديسينا مەكەمەلەرىن قاجەتتى اپپاراتتارمەن جابدىقتاۋ جۇمىستارى بيىل جالعاسىن تابادى. ماسەلەن، قوسىمشا جىلجىمالى رەنتگەن اپپاراتتارى، پاسيەنت مونيتورلارى، پەرفۋزورلار جانە ت.ب. جەتكىزىلدى. وتكەن جىلدىڭ وزىندە مەديسينا مەكەمەلەرى 1 مىڭنان استام فلۋومەترمەن، 330-دان استام وتتەگى كونسەنتراتىمەن، 50-دەن استام جاساندى تىنىس الدىرۋ اپپاراتىمەن تولىقتاي جابدىقتالدى. سونداي-اق، كت اپپاراتتارى، سيفرلى رەنتگەنوگرافيالىق جۇيەلەر، وتتەگى رەزەرۆۋارلارى جانە ت.ب. ورناتىلدى.
- دارى-دارمەكپەن قامتاماسىز ەتۋ. دارى-دارمەكتەر مەن جەكە قورعانىس قۇرالدارىنىڭ ەكى ايلىق قورى بولۋعا ءتيىس.
- ۆاكسينالاۋ قارقىنىن ارتتىرۋ. مەديسينا مەكەمەلەرىنىڭ بارىندە، سول سياقتى ءىرى ساۋدا ويىن-ساۋىق ورتالىقتارى مەن ساۋدا ۇيلەرىندە ۆاكسينالاۋ پۋنكتى اشىلدى. سونىمەن قاتار، ەڭبەك ۇجىمدارىن ۆاكسيناسيالاۋ ءۇشىن كوشپەلى بريگادالار ۇيىمداستىرىلدى. ءقازىر 318 مىڭنان استام ادام ۆاكسينا الدى.
سونداي-اق، سانيتارلىق نورمالاردى ساقتاۋ بويىنشا مونيتورينگتىك توپتاردىڭ جۇمىسى كۇشەيتىلدى.
"ۆاكسينالاۋ – بۇل جاي عانا تاڭداۋ ەمەس. الدىڭىزدا ەكى تاڭداۋ تۇر، ۆاكسينالاۋ ارقىلى تولىققاندى سالاۋاتتى ءومىردى تاڭدايسىز نەمەسە اۋرۋحانا توسەگىنە تاڭىلىپ، ىندەتپەن كۇرەسۋىڭىزگە تۋرا كەلەدى. سەبەبى كوروناۆيرۋس ادام اعزاسىن السىرەتىپ، دەنساۋلىققا قاتتى سوققى بەرەدى. مۇنداي ءقاۋىپتى شاقتا دەنساۋلىعىڭىزدى قاتەرگە تىكپەڭىز. ۆاكسينالاۋ عانا ءوزىڭىزدى، جاقىندارىڭىزدى جانە اينالاڭىزداعى ادامداردى قورعاۋعا مۇمكىندىك بەرەدى!"، — دەپ ۇندەۋ جاسادى ەلوردا اكىمى.
ءقازىر نۇر-سۇلتان "قىزىل" ايماقتا تۇر. كوروناۆيرۋستى جۇقتىرۋ كورسەتكىشى بويىنشا ەلوردا كوش باستاپ كەلەدى. سوڭعى تاۋلىكتە ەلدە 5179 ادامنان كوروناۆيرۋس تابىلسا، ونىڭ 1277ء-ى نۇر-سۇلتاندا تىركەلدى.
