Qazaqstanda jasandy intellekt pen avtomattandyrý saldarynan 2,5 million adam jumyssyz qalýy múmkin. Bul týraly jasandy intellekt jáne tsifrlyq damý vitse-ministri Dmitrii Mýn málimdedi, dep habarlaidy Dalanews.kz.
Onyń sózinshe, Eńbek jáne halyqty áleýmettik qorǵaý ministrliginiń esebi boiynsha, kei mamandyqtar jaqyn arada jasandy intellekt pen jańa tehnologiialardyń damýy nátijesinde ózektiligin joǵaltýy múmkin.
"Bes jyl ishinde shamamen 2,5 million mamannyń kásibi avtomattandyrý táýekeline tap bolady. Sonyń ishinde 1 millionǵa jýyq adamnyń jumysyn jasandy intellekt almastyrýy yqtimal", – dedi Mýn.
Úkimet bul ózgeristerge daiyn bolý úshin azamattardy jańa tehnologiialardy meńgerýge oqytpaq.
"2029 jylǵa deiin 1 million qazaqstandyq jasandy intellekt negizderin úirenedi dep josparlanyp otyr. Qazirdiń ózinde Astana Hub saitynda alǵashqy beinesabaqtar bar. Barlyǵy tegin, onlain túrde ótedi", – dedi ol.
Sondai-aq jýrnalister vitse-ministrden jasandy intellekttiń memlekettik apparattaǵy qyzmetkerler sanyn azaitýǵa áseri týraly surady.
"Iá, jasandy intellekt keibir kúndelikti protsesterdi avtomattandyrý arqyly memlekettik apparatty ońtailandyrýǵa kómektesedi. Biraq naqty qandai qyzmetter qysqaratyny ázirge belgisiz", – dep túsindirdi Dmitrii Mýn.
Onyń aitýynsha, jasandy intellekt tek belgili bir standartty mindetterdi oryndai alady, al adam bir ýaqytta birneshe túrli jumysty atqarady. Sol sebepti tehnologiia adamnyń ornyn tolyq baspaidy, tek onyń jumysyn jeńildetedi.
