Alaiaqtar Ulttyq bank, IIM jáne tipti úkimet qyzmetkerleri bolyp tanysyp, jábirlenýshilerdiń aqshasyna ie bolǵan. Zalaldyń jalpy kólemi – 1 mlrd teńge. Alaida zardap shekkenderdiń aitýynsha, quqyq qorǵaý organdary eshqandai áreket jasap otyrǵan joq, «Alaiaqtyq» baby boiynsha qozǵalǵan ister múlde jyljymai tur, dep habarlaidy Dalanews.kz.
Qaraǵandy oblysynyń turǵyny Iýliia Kýndeva qolynda búkil Qazaqstan boiynsha zardap shekken 143 adamnyń tizimi bar ekenin aitty. Onyń ózine nebári 4 saǵat ishinde 10 million teńge kóleminde nesie rásimdelgen. Al toptaǵy keibir adamdarǵa 30 million teńgege deiin nesie alynǵan.
«Meni jábirlenýshi dep tanyǵan qaýly bar. Biraq sonymen bári toqtap qaldy. Eshkimdi tappady, izdep jatqan da joq. Alaiaqtar shemalardy kóz ilespes jyldamdyqpen oilap tabady. Búgin qashyqtan qol jetkizý bolsa, erteń poliklinikadan qońyraý shalady, endi birde WhatsApp-tardy buzyp, 1414-ten habarlama taratady. Bizdiń organdar úlgermei jatyr», – deidi Iýliia Kýndeva.
Ár túrli ádispen aldanǵandar
Zardap shekkenderdiń keibirine alaiaqtar bank qyzmetkeri retinde habarlassa, basqalaryna memlekettik organ nemese politsiia ókili bolyp tanysqan.
Astanalyq Evgenii Kamennikov múlde ózgeshe shemaǵa tap bolǵan. Ol telefondy bólip tóleýge satyp almaq bolyp, tólem jasaǵan. Dúkende tólem ótpegenin aityp, qaita aýdarýdy suraǵan. Tipti bank te kompaniiamen jumys isteimiz dep rastaǵan. Keiin belgili bolǵandai, jalǵa alynǵan JShS atymen áreket etken jalǵan dúken eken. Nátijesinde ol joq telefon úshin 1 mln teńge tólep qoiǵan.
«Men Bostandyq aýdandyq politsiia basqarmasyna aryz jazdym. Aryzdy qabyldady, biraq eshqandai shara qoldanylǵan joq. Tergeýshiler habarlaspaidy, habarlamalardy oqymaidy. Moshennikter jumysyn jalǵastyryp jatyr, saittary da ashyq. Aýezov ROVD-na barǵanymda, tergeýshi aryz jazýdyń paidasy joq ekenin, muny ózińiz úshin ǵana istep otyrǵanyńyzdy aitty. Iaǵni, alaiaqtardy ustaý qiyn ekenin ashyq jetkizdi», – deidi ol.
Onyń aitýynsha, politsiianyń áreketsizdiginen keiin advokatymen birge Bas prokýratýraǵa hat jazýǵa májbúr bolǵan.
IIM málimetinshe, jyl basynan beri internet-alaiaqtyqqa qatysty 9 myńnan astam derek tirkelgen.
«Internet-alaiaqtyqtyń aldyn alý maqsatynda IIM BAQ pen áleýmettik jelilerdi baqylap otyrady. Osy kezeńde zańsyz sipattaǵy 16 myń internet-resýrs buǵattaldy, onyń ishinde 4 myńnan astamy internet-alaiaqtyqqa qatysty. Jábirlenýshi bolmas úshin jeke derekterdi úshinshi tulǵalarǵa bermeýge, kúmándi siltemelerge ótpeýge, telefonyńyzǵa qosymsha baǵdarlamalar ornatýǵa jáne belgisiz qońyraýlarǵa jeke málimetterdi jariia etpeýge keńes beremiz», – dedi IIM Kriminaldyq politsiia departamentiniń aǵa jedel ýákili Erlan Asanov.
