Internet-alaiaqtar aqshany kartaǵa aýdartpai, «kýrer» bolyp kelgen adamdarǵa qolma-qol berýdi bastap ketkeni anyqtaldy, dep habarlaidy Dala News.
Almaty qalasynda kiberqylmyspen kúres basqarmasy internet alaiaqtarynyń jańa shemasyn áshkereledi. Endi qylmyskerler jábirlenýshilerden aqshany bóten kartaǵa aýdartpaidy, kerisinshe óz adamdaryn «kýrer» retinde jiberip, qolma-qol alyp ketedi.
Bul týraly óńirlik kommýnikatsiialar qyzmetindegi brifingte Almaty qalalyq politsiia departamentiniń kiberqylmysqa qarsy kúres basqarmasy bastyǵynyń orynbasary Erkebulan Qoishibaev málimdedi.
Onyń aitýynsha, buǵan deiin alaiaqtar kóbine «drop-kartalardy» paidalanǵan. Alaida bir jyldan beri jumys istep turǵan antifrod júiesi bul arnalardy kúrt shektegen.
– Qazir olar jábirlenýshilerdiń úiine nemese jumys ornyna baryp, ózin kýrer retinde tanystyryp, aqshany tikelei alyp ketedi. Almatyda osyndai shemaǵa qatysy bar 20 men 35 jas aralyǵyndaǵy tórt adam ustaldy. Qazir olardyń ózge de qylmystarǵa qatysy tekserilip jatyr, – dedi Qoishibaev.
Politsiia dereginshe, 2025 jyly Almatyda internet alaiaqtyqtyń 2500-den astam faktisi tirkelgen. Keltirilgen jalpy shyǵyn kólemi shamamen 2,5 mlrd teńgeni quraidy. Onyń ishinde 700 mln teńgeden astam qarajat jábirlenýshilerge qaitarylǵan.
Eń jii qoldanylatyn shemalar qatarynda ózin bank qyzmetkeri, qaýipsizdik qyzmetiniń ókili, memlekettik organ nemese bailanys operatory retinde tanystyratyn qońyraýlar men habarlamalar bar. Sonymen qatar jalǵan saittar, feik internet-dúkender, jumys usyný jáne investitsiia týraly aldaý tásilderi de keń taralǵan.
Quqyq qorǵaý organdarynyń «Kiberqadaǵalaý» júiesi arqyly 17 myńnan astam sait buǵattalǵan. Onyń ishinde esirtkige qatysty resýrstar men destrýktivti kontent taratatyn platformalar da bar.
Politsiia turǵyndardy saq bolýǵa shaqyrady. Belgisiz adamdarǵa aqsha bermeý, ózin bank nemese memlekettik organ qyzmetkeri retinde tanystyrǵandarǵa senbeý, kúmándi siltemelerge ótpeý jáne mundai jaǵdai týyndasa, birden 102 nómirine habarlaý qajet.
