«Alataý jastary»: Almaty oblysynda jastarǵa arnalǵan baǵdarlama bastalady
«Alataý jastary» sharttaryna keler bolsaq, baǵdarlamaǵa qatysýshynyń Almaty oblysyndaǵy resmi eńbek ótili keminde bir jyl bolýy tiis. Ony mindetti túrde zeinetaqy jarnalarymen rastaý qajet.
Sondai-aq, úmitker Almaty oblysynda keminde bir jyl merzimge turaqty tirkeýi bolýy tiis. Taǵy bir shart – baǵdarlamaǵa qatysýshy men onyń otbasy músheleri sońǵy 5 jyl ishinde jyljymaityn múlikke ie bolmaýy kerek.
– Memleket Basshysy Qasym-Jomart Toqaev Qonaev qalasynyń stýdentter men jastar úshin ǵylym-bilim berý ortalyǵy jáne tartymdy qala bolýǵa tiis ekenin atap ótti. Osy maqsatta jas otbasylardy yntalandyrý úshin biz «Otbasy bankimen» birlesip jańa turǵyn úi baǵdarlamasy máselesin pysyqtadyq. Biyl joba úshin 600 million teńge bóldik. Biraq, kelesi jyly somany ulǵaitýdy josparlap otyrmyz, – dedi Almaty oblysynyń ákimi Marat Sultanǵaziev.
Bank ókilderi baǵdarlamaǵa qatysýshylary biyl turǵyn úi ala alady dep sendirýde.
– Almaty oblysy Almaty, Astana, Qaraǵandy, Jambyl jáne Qostanai oblystarynda osyndai baǵdarlamalardy iske qosýdyń tabysty tájiribesin qabyldaýda. Onda jergilikti bilik «Otbasy bankimen» birlesip jastardy qoldaý úshin turǵyn úi baǵdarlamalaryn iske qosty. «Otbasy Banki» jeńildetilgen nesieleýge kómektesedi. Osyndai qoldaýdyń arqasynda óńir turǵyndary biylǵy jyly alǵashqy qonys toiyn toilai alady, – dedi «Otbasy BANKI» Almaty oblystyq filialynyń direktory Ǵalymjan Shalǵymbaev.
Jańa turǵyn úi baǵdarlamasyna qatysý úshin ótinimderdi qabyldaý 2022 jylǵy 1 qarashada bastalady jáne týra bir aiǵa sozylady. Úmitkerlerge oblystyq ákimdiktiń ishki saiasat basqarmasyna ótinish berý qajet bolady.
Ótinimderdi qabyldaý aiaqtalǵannan keiin ákimdikten arnaiy komissiia jinalǵan baldarǵa sáikes baǵdarlamaǵa qatysýshylardy irikteidi. Baldyq kórsetkishke erli-zaiyptynyń nekedegi jyldar ýaqyty, balalarynyń bolýy, jumys ótili, kásibi jáne qyzmet salasy áser etedi.
Ótinimderdi qabyldaý aiaqtalǵannan keiin qatysýshylardyń tizimi qalyptastyrylady, ol «Otbasy Bankine» jiberiledi . Bankte tólem qabilettiligin baǵalaýdan ótip, óz betinshe baspana tabý qajet bolady. Ony satyp alý úshin «Otbasy banki» 10 mln teńge mólsherinde qaryzdyń eń joǵary somasyn bere alady. Eger jyljymaityn múliktiń quny 10 mln teńgeden asatyn bolsa, onda aiyrmashylyqty óz qarajatynan tóleýge bolady.
Eger baǵdarlamaǵa qatysýshy bastapqy turǵyn úidi satyp alsa , onda ol úshin bastapqy jarna 0% quraidy. Naryqtaǵy ekinshi deńgeidegi páter nemese jeke úi satyp alynsa, onda bastapqy jarna 10% quraidy.
Nesie boiynsha paiyzdyq mólsherleme jyldyq 5%-ǵa teń bolady (JES 5,2%). Qaryzdyń eń uzaq merzimi – 19 jyl.
