Parlament palatalarynyń birlesken otyrysynda depýtattar "Alataý qalasynyń arnaýly mártebesi týraly" Konstıtýsıalyq zań jobasyn birinshi oqylymda maquldady, dep habarlaıdy Dalanews.kz.

Qujatqa sáıkes Alataý jeke qarjy modeli, arnaıy basqarý rejımi jáne sapalyq turǵydan jańa deńgeıdegi ınstıtýsıonaldyq bazasy bar derbes ekojúıe retinde qarastyrylady.

Qalany basqarý modeli qazirgi jergilikti ákimshilik basqarý men strategıalyq damýdy bólý qaǵıdatyna negizdelmek. Bul nátıjege jaýap beretin biryńǵaı ortalyq - Alatau City Authority qurýǵa múmkindik beredi. Sóz premer-mınıstr basqaratyn keńes jetekshilik etetin, Úkimet quramyna kirmeıtin memlekettik organǵa aınalatyn memlekettik qor nysanyndaǵy ákimshilik týraly bolyp otyr.

Keńes qalany damytýǵa qatysty strategıalyq sheshimderdi, sondaı-aq, ákimshilik aktilerin bekitedi. Bul aktilerdiń zańdy kúshi jergilikti deńgeıde zańdarǵa teńestiriledi. Ákimshiliktiń atqarýshy fýnksıasyn bas atqarýshy dırektor júzege asyrady.

Bul rette máslıhat pen ákimdik sıaqty konstıtýsıalyq jergilikti basqarý organdarynyń qyzmeti túbegeıli ózgermeıdi. Olar qalanyń áleýmettik, komýnaldyq jáne saıası salalardaǵy kúndelikti tirshiligin qamtamasyz etedi.

Alataýdy damytý áýel bastan tolyqqandy Smart City - Digital by default ("Avtomatty sıfrlyq") qaǵıdatyna negizdelgen zıatkerlik qala retinde qarastyrylady. Basqarýdyń barlyq negizgi prosesi sıfrlyq formatta jobalanyp, jasandy ıntellektige negizdelgen sheshimdermen toǵysady.