Alataý aýdanynda az qamtylǵan 46 otbasyǵa tegin gaz tartylǵan
Azamat Qaldybekovtyń aitýynsha, tólengen járdemaqynyń jalpy somasy 381,8 mln teńgeni quraidy, sonymen qatar 157 otbasy 8,2 million teńge kóleminde turǵyn úi kómegin aldy.
– Memleket halyqtyń osal toptaryna, sonyń ishinde jumyspen qamtý máselelerine jan-jaqty qoldaý kórsetedi. Mysaly, «Eńbek» memlekettik baǵdarlamasy aiasynda 2780 adam jumysqa ornalastyryldy, onyń ishinde áleýmettik jumys oryndaryna 161 adam, qoǵamdyq jumysqa 1028 adam, jastar praktikasyna 193 adam, 138 adam 200 AEK kóleminde grant aldy jáne 1335 adam turaqty jumyspen qamtylǵan, – dedi A. Qaldybekov.
Sonymen qatar, biyl demeýshilerdiń qoldaýymen 3 myńǵa jýyq muqtaj otbasy azyq-túlik jiyntyǵymen, 300 otbasy kiimmen qamtamasyz etildi.
Aýdan ákimi sondai-aq Almaty qalasynyń Energotiimdilik jáne infraqurylymdyq damý basqarmasy men «Halyq bankiniń» birlesken jobasy týraly aitty. Bank esebinen az qamtylǵan otbasylardyń 46 jeke turǵyn úii ortalyq gazǵa qosylǵan.
Azamat Qaldybekov aýdan ákimdigi áleýmettik qyzmetterdiń qoljetimdiligin arttyrý úshin qajet nárseniń bárin jasap jatqanyn qosty.
«Búginde aýdanda az qamtylǵan otbasylar men kóp balaly otbasylardy qoldaý úshin «Baqytty otbasy» áleýmettik ortalyǵy men «Alataý analary», «Analarǵa kómek» jáne «Zeiin» qoǵamdyq qorlary jumys isteidi. Bul ortalyqtar analarǵa konsýltatsiialyq jáne resýrstyq qoldaý kórsetedi, negizgi treningter ótkizedi, jumysqa ornalasýǵa kómektesedi», - dep atap ótti A. Qaldybekov.
Sonymen qatar, áielder suranysqa ie mamandyqtar boiynsha: tiginshi, shashtaraz, kompiýterlik saýattylyq oqidy. Turmysy tómen otbasylardyń balalaryn oqytý máselesine kóp kóńil bólinedi, olarǵa mýzyka men óner, bi men ár túrli aspaptarda oinaý tegin úiretiledi.
