Alash qozǵalysynyń tarihyna qatysty arhiv materialdarynyń kópten kútken jinaǵy jaryq kórdi. Bul týraly memlekettik keńesshi Erlan Qarin áleýmettik jelidegi paraqshasynda jazdy, - dep habarlaidy Dalanews.kz.
Bul – «Alashorda isi. 1920-1940 jyldar. Qujattar men materialdar» dep atalatyn 12 tomdyq arhiv qujattary.
Jańa basylym – Saiasi qýǵyn-súrgin qurbandaryn tolyq aqtaý jónindegi memlekettik komissiianyń jumysy barysynda jinalǵan biregei arhiv qujattarynan turatyn jinaq.
Bul jinaqty daiyndaýǵa 30-dan astam tarihshy, arhivshi jáne arheograf atsalysty. Olardyń qatarynda QR Prezidenti arhiviniń, Shoqan Ýálihanov atyndaǵy tarih jáne etnologiia institýtynyń, Abai atyndaǵy Qazaq ulttyq pedagogikalyq ýniversitetiniń qyzmetkerleri bar.
Jobanyń ǵylym jetekshisi – QR UǴA akademigi, tarih ǵylymdarynyń doktory Mámbet Qoigeldiev.
Basylymǵa partiialyq-memlekettik qurylymdarda jáne arnaýly memlekettik arhivterde arnaiy saqtalǵan 3 myńnan astam material endi, – dep jazady Qarin.
12 tomnan turatyn qujattar men derekter jinaǵynda Álihan Bókeihan, Ahmet Baitursynuly, Mirjaqyp Dýlatov, Halel Dosmuhamedov jáne basqa da Alash qairatkerleri ómiriniń buryn beimálim tustarynan syr shertetin qujattar bar.
2 myń danamen jaryq kórgen jinaq elimizdiń oqý oryndary men ǵylymi mekemelerine taratylady. Osylaisha, Qazaqstan tarihyn odan ári zerdeleý jáne eldiń tarihi jadyn saqtap, nyǵaitý turǵysynan óte mańyzdy jáne asa qundy biregei materialdar alǵash ret ǵylymi ainalymǵa engizildi.
Jalpy, 2020-2023 jyldary jumys istegen Memlekettik komissiianyń qyzmetine 425 ǵalym, onyń ishinde aimaqtardan kelgen 260 zertteýshi jumyldyryldy. Úsh jyldyń ishinde 60 memlekettik jáne vedomstvolyq arhivten 700 myńǵa jýyq is jinaldy, 2.6 millionǵa jýyq material men qujattyń qupiialyǵy alynyp tastaldy, saiasi-qýǵyn súrginniń qurbany bolǵan 311 myńnan astam adam aqtaldy, – dep túiindegen Erlan Qarin.
