Alǵashqy jolaýshylardy «Jetisý» áýe kompaniiasynyń prezidenti Qalmuhamet Donsebaev qarsy aldy. Onyń aitýynsha, qazirgi ýaqytta Úsharal qalasynyń áýejaiy áýe kemelerin qabyldaýǵa jáne shyǵarýǵa tolyq daiyn.
«Biz azamattardyń qaýipsiz jáne jaily ushýy úshin barlyq qolaily jaǵdaidy jasaimyz. Mamandarymyz óz biliktilikterin arttyrý maqsatynda arnaiy oqý oqyp, tiisti sertifikattaryn alyp, halyqqa qyzmet kórsetýde. Sondai – aq, qazirgi epidemiologiialyq jaǵdaiǵa bailanysty áýejaida sanitarlyq normalar qatań saqtalýda» - dedi, aviakompaniia basshysy.
Búginde, Alakóldiń týristik áleýeti artyp keledi. Oǵan dálel, búgingi qatynas boiynsha Almatydan 18 adam ushyp kelse, óz kezeginde keri jaqqa 29 jolaýshy ushyp barady. Al, Nur – Sultannan birinshi reispen 16 adam ushyp kelse, keri baǵytqa 9 jolaýshy áýe kemesimen ushty.
Aita keterligi, týristik maýsym qarsańynda «Almaty – Úsharal – Almaty» (kún saiyn), «Nur – Sultan – Úsharal – Nur – Sultan» (aptasyna tórt ret) jáne «Taldyqorǵan – Úsharal – Taldyqorǵan» (kún saiyn) baǵyttary boiynsha reister jumys istei bastady.
1 maýsymnan bastap «Nur – Sultan – Úsharal – Nur – Sultan» baǵyty boiynsha reister kún saiyn júzege asyrylatyn bolady.
Sonymen qatar, respýblikalyq jáne oblystyq biýdjetten bólinetin sýbsidiialardyń arqasynda áýe reisiniń bilet baǵasy qoljetimdi. Mysaly, «Nur – Sultan – Úsharal – Nur – Sultan» baǵyty boiynsha – 16 myń teńge (áýejai qosatyn 1700 teńge paiyzymen – 17 700 teńgeni), «Almaty – Úsharal – Almaty» baǵyty boiynsha – 15 myń teńgeni, «Taldyqorǵan – Úsharal – Taldyqorǵan» baǵyty boiynsha – 8 myń teńgeni quraidy.
Mundaǵy ushaqtar joǵary qaýipsizdik pen jailylyqty qamtamasyz etedi. Olar: «Bombardier CRJ200», «Bombardier DASH 8 Q400», LET L – 410 áýe kemeleri.
Jalpy, «Úsharal» áýejaiy – Almaty oblysynda týrizmdi damytýǵa arnalǵan infraqurylymnyń basty obektileriniń biri. Sondyqtan munda jolaýshylar úshin barlyq jaǵdai jasalǵan.
Kóldiń shipaly sýymen emdelip, ýaqytty tiimdi paidalanyp, otandyq týrizimniń damýyna birge úles qosaiyq.
Qasiet ARSTAN,
Alakól aýdany ákiminiń
baspasóz-hatshysy
