Qazaqstan Respýblikasynyń Memlekettik keńesshisi Erlan Qarin "Birlik pen damý: Memleket basshysy Qasym-Jomart Toqaevtyń saiasi baǵdarynyń basty negizderi" atty maqalasynda qoǵamda qanshama kózqaras, qanshama pikir qaishylyǵy bolǵanymen, barshamyz ortaq múdde, jalpyulttyq múdde jolynda uiysýymyz kerrek ekenin málimdedi, - dep habarlaidy Dalanews.kz.
Erlan Qarin qazaqstandyqtarǵa mańyzdy úndeý jasady. Sondai-aq, eldiń birligine, tutastyǵyna nuqsan keltiretin áreket pen sózden alys bolýǵa shaqyrdy.
"Qoǵamnyń ashyqtyǵy, ekonomikalyq reformalardyń iske asýy, kommýnikatsiianyń jańa túrleriniń qarqyndy damýy siiaqty naqty sebepterge bailanysty sol qoǵamnyń qurylymy únemi ózgerip otyrady. Qoǵamdyq-saiasi keńistik keńeiip, kúrdelene túsedi, iaǵni jańa stratalar, áleýmettik toptar men sýbmádenietter, san alýan saiasi jáne ideologiialyq kózqarastar paida bolady.
Qazir bizdiń qoǵamda saiasi ustanymy ártúrli azamattar, atap aitqanda, liberaldar, sotsialister, konservatorlar, ońshyldar, solshyldar jáne tsentrister bar. Olar túrli saiasi idealǵa jáne qundylyqtarǵa senedi. Osy oraida biz pikir alýandyǵyn damyta otyryp, eń aldymen, jalpyulttyq múddemizdiń birtutastyǵyna basa mán berýimiz qajet.
Bul turǵyda el ishine iritki salatyn áreketterge ǵana emes, jurtty arandatyp, daý-damai týǵyzýy múmkin kez kelgen sózge abai bolǵan jón. Ókinishke qarai, tym sholaq oilaityn keibir ásirebelsendiler, keide tipti is-áreketi aqylǵa syimaityn adamdar kópshilikke óziniń syńarjaq kózqarastaryn kúshpen tańyp, jurtshylyqtyń pikirin óz yńǵaiyna qarai burǵysy keledi.
Qazaqta "ala jipti attamaý" degen uǵym bar. Bizdiń saiasatta da muny berik ustaný kerek. Iaǵni eldigimizge, birligimizge, yntymaǵymyzǵa syzat túsiretin dúnieden alshaq bolǵan jón. Qoǵamdaǵy pikirtalas kezinde attap ótýge bolmaityn shek, iaǵni "Redline" naqty belgilenýge tiis. Bul degenimiz – qandai da bir taqyrypty talqylaýǵa tyiym salý nemese tsenzýra jasaý emes. Bul – saiasi pikirtalas kezinde ustamdy bolyp, sabyr saqtaýǵa shaqyrý. El aldynda júrgen azamattar, iaǵni qoǵam belsendileri, buqaralyq aqparat quraldarynyń qyzmetkerleri, blogerler, azamattyq sektordyń ókilderi berekeli birligimizge syzat túspesin dese:
– etnosaralyq qatynastarǵa jáne til máselesine;
– din salasyna;
– syrtqy saiasatqa qatysty ahýaldy ýshyqtyrmaýǵa basa mán berýi qajet.
Bizdiń qoǵam bul máselelerge qatysty janjal týǵyzatyn sóz taratýǵa, ashý-yzaǵa toly málimdeme jasaýǵa bolmaitynyn jaqsy túsinedi. Bul týrasynda bilikti mamandar men sarapshylar ǵana kásibi turǵydan pikir talastyra alady.
Memleket eldiń yntymaǵyn buzyp, shańyraǵyn shaiqaltqysy keletin kez kelgen áreketke zań arqyly qatań tosqaýyl qoiady. "Shekten shyǵýǵa jol joq" degen qaǵida árdaiym basshylyqqa alynady. Biz din bostandyǵyn qoldaimyz, alaida soqyr senim men nadandyqqa qarsymyz. Biz otanshyldyqty qoldaimyz, alaida ksenofobiia men ásireultshyldyqqa qarsymyz. Biz liberalizmdi qoldaimyz, alaida júgensizdik pen nigilizmge qarsymyz.
Barsha adamdar, ásirese qoǵamdyq-saiasi ómirge belsene atsalysyp júrgen azamattar, óziniń saiasi kózqarasy men ustanymyna qaramastan, jalpyulttyq múddeni, memlekettilikti saqtaý jáne nyǵaitý máselesin bárinen biik qoiýǵa tiis", - dedi Erlan Qarin.
